محمد العمراني
لا حديث في مواقع التواصل الاجتماعي إلا عن مقهى RR-ICE الشهيرة بمنطقة الغندوري بطنجة، وذلك بسبب الفاتورة الباهظة للمشروبات وكذلك بسبب فرضها على الأبناء ضرورة طلب مشروب آخر كل ساعة ونصف.
هاد الضجة كشفت فضيحة أخطر بكثير، وهي المساحة الضخمة ديال طيراسا ديالها، وللي الجميع يتساءل هل صاحب المقهى عندو التراخيص القانونية ديال احتلال الملك العمومي، وكيأدي الواجبات ديالو لجماعة طنجة، وللي مفروض تكون بملايين السنتيمات بالنظر لشساعة المساحة المحتلة.
و خصنا نعرفو أيضا شحال كيخلص فضريبة المشروبات الغازية، بالنظر للفاتورة الغالية للي كيفرضها على الزبائن.
المعطيات المتوفرة لطنجاوي، تؤكد ان هناك اختلالات خطيرة في ملف احتلال الملك العمومي من طرف هاد المقهى، وان داك شي للي كيخلص غير الفتات، وهذا يعني ضياع مبالغ طائلة من المال العام، بمعنى ان هاد شي فات السيبة، وكيفرض محاسبة المتورطين في التغطية على هاد المنكر، وبطبيعة الحال المسؤول الاول هو العمدة الليموري، للي تابعاه الفضايح وحدة مور وحدة.
وأمام هاد المعطيات الخطيرة، وحيث ان الامر يتعلق بإهدار المال، فإن الرأي العام ينتظر من الوالي التازي، المعروف بنظافة يده وحياده التام إزاء الفرقاء السياسيين ومسؤولي المؤسسات المنتخبة، التدخل الحازم و إيفاد لجنة ولائية للتقصي في حقيقة احتلاله لهاته المساحة الشاسعة من الملك العام، للي هو كيبقى ملك المدينة والساكنة، وليس مقبولا يجي واحد يحتلو بدون موجب حق ويربح من موراه الملايير، وترتيب المساءلة القانونية في حق كل المتورطين، بناء على ما ستسفر عنه نتائج هاد اللجنة.
