محمد العمراني

معجزة سياسية بكل المقاييس والمعايير وقعت أمس الثلاثاء، عندما تمكن الحاج يوسف بنجلون من الفوز بعضوية مجلس المستشارين ضمن فئة مجلس جهة طنجة تطوان الحسيمة، بحصوله على 17 صوتا.

دخلنا عليك بالله ٱ الحاج يوسف كي درتي جبتي  هاد الاصوات، ونتا الحزب ديالك الاتحاد الاشتراكي للقوات الشعبية يالله عندكوم  08 ديال الاصوات، هاد 09 للي زايدة كي درتي ليها؟!..

هاد الناس للي صوتو عليك راهوم منتمون لاحزاب سياسية اخرى، وهذا معناه انهم خانوا الاحزاب ديالهوم وصوتوا عليك!!!.. 

زعما قنعتيهوم بالبرنامج السياسي ديالك؟!

او يكونوا تاقوا فيك، حيث نتا رجل معروف عليك التقوى والورع، والناس كيشهدوا لك بالمعقول والغيرة على الوطن؟؛ 

هادي ممكن تكون، خصوصا وانك يوم الاحد المنصرم عطيتي الدليل القاطع بأنك كتبغي مدينتك وبلادك، عندما كنتي من مهندسي انتخاب ولد الشرقاوي رئيسا لمقاطعة طنجة المدينة, والساكنة الحمد لله فرحانة بهاد شي للي درتي، وزاد الافتخار ديالهوم بيك بالفيديو ديال الفقيه عشبون!!!. 

النجاح ديالك ٱسي يوسف فعلا معجزة سياسية، يجب ان يتم تدريسه لطلبة العلوم السياسية، ويجب ان يستفيد منه كل الذين يفكرون في حجز العضوية بمجلس المستشارين. وانا كنطلب منكم، عفوا كنلتمس منكم السيد المستشار المحترم جدا جدا  تطبع كتاب سميه: "كيف تصبح عضوا في مجلس المستشارين ب 8 اصوات فقط". 

إي بالله العظيم، راك سياسي خطير و داهية، كون متواضع وخلي السياسيين ديال المغرب يتعلموا منك علم السياسة، وادوات وتقنيات ووسائل النجاح فمجلس المستشارين.. 

مين كنتي كتنجح فالمستشارين عن طريق غرفة الصيد البحري، كنت كنقول انك من كبار المستثمرين، باش منقولش وصف ٱخور، في قطاع الصيد البحري، عليها كيصوتوا عليك، واخا بغاو يظلموك ويتعداو عليك مين تهموك، والعياذ بالله، بتقديم رشوة للاعضاء باش يصوتو عليك!!!.

ولكن مين نجحتي دابا، وصوتوا عليك اعضاء مجلس الجعة.  ونتا يالله عندك 08 ديال أصوات، و هادي شهر فقط باش نجحتي عضو فمجلس الجهة، والاعضاء مزال ماكيعرفوش بعضهوم، تأكدت بأنك فقيه وحرايفي فالسياسة، حيث عملتي الحملة عن بعد، وقنعتي الناس يصوتوا عن بعد، بقيتي فطنجة، ما مشيتي لشفشاون، ما زورتي المضيق، ما طلعتي للعرائش، سبحانك ياجليل، الناس البارح جاو من كل اقاليم الجهة وصوتوا عليك!!.. 

ٱسي الحاج باز وخلاص،

ها بوجور ديالك،

و.. شابو شابو.. 

شوف ٱ الحاج، انا اول واحد غادي

يتضامن معاك إذا بغاو يتعداو عليك، ويشكوا في مصداقية النتيجة للي حققتي..

راك عطيتي البارح الدليل الملموس للاعضاء للي صوتوا عليك انك رجل تمارس السياسة بنزاهة وشرف، ومعندكش مع الفساد الانتخابي ابدا ابدا!!!. 

هنيئا لكم سيدي الحاج المقعد في قبة مجلس المستشارين، وهنيئا لكم حيازة لقب "senador"، الذي تعشق كثيرا ان ينادوه بك خلال زياراتك للجارة إسبانيا.

فالحقيقة، هذا الانجاز العظيم للي حققتوه Senador Youssef هو للي جعلني نفهم المعنى الحقيقي ديال قصة: "البغل زطم فالمرايا"