محمد العمراني

رغم ان سيدنا طلب من المسؤولين باش يخدمو بالجدية والمعقول، لكن مزال شي مسؤولين كيبان انهم شادين طريق أخرى.
من هاد العينة كاين رئيس الدائرة الحضرية السواني بطنجة، سميتو محمد زرقيق، للي يالله عاد تعين فطنجة هادي شي 3 اشهر، هاد المسؤول دخل راسو كطرف فالملف ديال هيكلة سوق كاسباراطا، وعلن الانحياز ديالو مع فئة هي أقلية داخل أكبر سوق بشمال المملكة ضد الاغلبية الساحقة من التجار، وللي عندهوم رؤية مخالفة لإعادة الهيكلة، وهذا حقهم بطبيعة الحال.

هاد المسؤول الترابي دار جميع المحاولات باش ينصب واحد الشخص رئيسا لرابطة تجار الاجهزة الالكترونية بالسوق المذكور رغم ان السيد معاه ستة ديال التجار فقط، فالوقت ان الاغلبية الساحقة ديال هاد الصنف من التجار باغيين يديرو رئيس آخر، لكن سيادة رئيس الدائرة كيبان انه عندو تعليمات من شي جهة باغا تنصب راسها الحاكم الفعلي والآمر الناهي داخل السوق، وخصها بأي وسيلة تفرض رئيس موالي ليها، حيث الامر عندو علاقة بانتخاب رئيس فدرالية روابط تجار سوق كاسباراطا،  وللي غادي يكون المخاطب الوحيد عند السلطات وهو الحاكم الفعلي ديال السوق. 

ولذلك فرئيس الدائرة رفض يرخص للتجار يديرو الجمع العام ديالهوم، ضدا على كل القوانين، وصرد ليهوم تهديدات انه غادي يربي أي واحد مغاديش يشد معاه الطريق، بل وصل التهديد لدرجة انه غادي يدير شكاية بهادوك للي كيعتبرهوم راسهم سخون بتهمة التظاهر بدون ترخيص..

الله عليك ياسي زرقيق، راك كتلعب بالعافية، انت رجل سلطة خصك تكون محايد، ومطلوب منك تتقيد بالتعليمات ديال الرؤساء ديالك.
دابا هاد التهديد والضغط للي كتمارسو على التجار، واش عندك تعليمات من عند رئيس الشؤون الداخلية، واش عندك تعليمات من عند الكاتب العام ديال العمالة، واش عندك تعليمات من عند الوالي التازي؟..
يستحيل هاد الناس يطلبو منك تهدد التجار خدمة لمصالح فئة معينة داخل السوق، حيث هاد المسؤولين معروف عليهوم كيحترمو القانون وحريصين على تطبيقو.
المصيبة فهاد البلاد ان مسؤولين بحال هاد زرقيق هوما للي كيعطيو هدايا مجانية لبعض الجهات باش تأجج الاوضاع، وتركب عليها خدمة لاجندتها التخريبية، وفالاخير الدولة هي للي كتخلص الفاتورة..
كنظن موحال واش فهمتي هادي آ سي زرقيق.

 هذا راه سوق كاسباراطا، فيه ازيد من 4500 محل تجاري، وما يزيد عن 20 الف عائلة كتعيش من هاد السوق، ولذلك آ سي زرقيق رد البال فين كتزطم، هذا ملف الحل ديالو هو الحوار والانصات للناس ماشي بالتهديد واستعمال القوة خدمة لمصالح اقلية عندها طموح تجاري وانتخابي.

خلاصة القول آسي زرقيق.. 
خليك رجل سلطة محايد، وعلى حسب العلم ديالي التعليمات خصها تجيك من الولاية ماشي من مقهى  نوصير اثناء تناول وجبة الفطور .