محمد العمراني
واحد القايد ديال قصر المجاز، عمالة الفحص أنجرة، هادي ثلاث أيام خدا قرار بمنع المصطافين يستعملو الباراصولات ديالهوم فشاطئ الدالية، للي تابع لتراب القيادة ديالو. وكلف المخازنية ينفذو هاد القرار العجيب والغريب وللي معندو حتى سند قانوني.
بغينا نعرفو واش هاد القايد المهمة ديالو هو الحرص على تطبيق القانون او باغي يرجعنا لفترة القايد الگلاوي، وعاطي لراسو الحق يفرض لحكام ديالو دون موجب شرع.
اليوم جات واحد السيدة كبيرة فالسن من أبناء الجالية المغربية، بغات تستمع برمال شاطئ الدالية، وغير مسكينة جبدات الباراصول ديالها جاو عندها المخازنية منعوها، وخاطبوها بلغة التهديد والحگرة: "ممنوع استعمال الباراصول ويلا معجبك الحال خوي"، واش هذا هو أسلوب التعامل مع المواطنين؟.
وماشي غير هاد السيدة، بل كيمنعو جميع المصطافين يستعملو الباراصولات ديالهوم.
دأبا إذا كان هاد القرار للي خداه هاد القايد عندو سند قانوني، فكان من الواجب يتم تعليق بلاكة كبيرة مكتوب فيها هاد المنع والسند القانوني ديالو. اما تمنع عباد الله بهاد الطريقة الاستفزازية فهادا معناه ان هاد القايد مافخباروش التعليمات ديال سيدنا بضرورة تطبيق المفهوم الجديد للسلطة، وما فراسوش التنبيهات الصارمة ديال سيدنا بضرورة التعامل باحترام مع المواطنين والتقيد بالقانون.
واش هاد القايد ماعارفش انه بحال هاد الممارسات راه كيساهم فتشويه صورة بلادنا وسمعة المؤسسات ديالها؟!.
الغريب فالأمر هو ان منع المصطافين من استعمال الباراصولات ديالهوم كيخدم مصلحة بعض الناس للي كراو من عند الجماعة مساحة من شاطئ الدالية باش يكريو البلاصة معاها الباراصول، وهنا كنطرحو السؤال: واش القايد بوعي منه او بدون وعي كيخدم المصلحة ديال تجار الباراصولات، وف كلا الحالتين راهي فضيحة تستوجب المساءلة.
أخيرا هاد الفضيحة واش فخبار عامل عمالة الفحص أنجرة، او هاد القايد كيتصرف من راسو؟.
