محمد العمراني

واحد الباشا هشام ديال طنجة المدينة كولشي كيسول عليه، الكوموندمون ديالو عامر مشاكل وهو غابر، عندو مشاغل واهتمامات أخرى.

دابا كاين واحد الفضيحة كبيرة بعيدة على كورنيش ديال المدينة ب20 متر، والباشا فين هو؟.

كيفاش واحد كيركب طنف فوق طنف، وحتى واحد ما هدر معاه، هاد السيد إذا معندوش الرخصة فهذا كيعني ان السيبة فطنجة وللات بالعلالي، واذا كان عندو رخصة، فهذا للي وقع خصو يتحاسب، ومن شبه المستحيل تكون عندو رخصة.

دابا ما بقينا فاهمين والو فهاد طنجة، كيفاش الدراوش والمواطنين البسطاء كاتحاسبو معاهوم بالياجورة، والسنتيم والفاصلة، والناس للي غلاض كيديرو مابغاو ؟

كيفاش المواطن كاتحراف لو مسكين فشهادة ديال الربط بشبكة الماء والكهرباء حيث عندو بيت زايد او شي مخالفة، او عندو طبقة زايدة، والقايد كيطلع للسما، والشهادة والله لا توقعت، إلا إذا (……)، بينما شي ناس محظوظين يزيدو للي بغاو سوا عندهوم الرخصة او معندهومش، وياخدو الشواهد فوقاش بغاو!..

دابا آ الباشا هشام، أو "خويا هشام"، (كتفرحك هادي ياك) راك مسؤول على القلب النابض د مدينة طنجة، خص النهار يكون فيه 48 ساعة وموحال واش تقدك باش تتبع ما يجري عندك فالكوموندمون ديالك، ولكن كولشي كيلاحظ انه عندك الوقت شايط بزاف، لدرجة انك خليتي المشاكل العويصة ديال المدينة (احتلال الملك العمومي، ها مشاكل المدينة القديمة، ها المصلى، الدرادب، وزيد وزيد) ومشيتي كتفصل وتخيط فالخريطة السياسية ديال مدينة طنجة مع عشيرك منير.

غير واحد الحاجة ديرها فبالك آ "خويا هشام"، منير ما كيتحالف مع حد، منير إذا شفتيه قريب لشي واحد، عرف غادي يقطع بيه شي قنطرة ويسمح فيه، بل جُرَّة ديالو كاتسالي مقودة، ويمكن لك تدير واحد البحث سريع، وغادي تلاقا لائحة كبيرة ديال الضحايا، سواء من داخل الحزب او من خارجه، وحتى من بعض المسؤولين..

ما علينا نشدو هاد القوس، ونرجعو للموضوع ديالنا.

آ"خويا هشام" نتا خصك مصيبة ديال الوقت غير باش تمسح المخلفات والفضائح ديال القايد حسام، كيفاش جبرتي الوقت باش تبقى تفصَّل نتا و عشيرك منير فالسياسة ديال المدينة، وباغي تدير رئيس(ة) على المقاس، ومشيتي بعيد، تطوعتي باش تعاون(ها) فتسيير المقاطعة، هاد شي علاش زعما؟!.

منير عرفناه علاش باغي يتحكم فرئاسة مقاطعة طنجة المدينة، ونتا "خويا هشام" علاش؟. زعما تكون عندك غيرة على إنعاش الحركية الاقتصادية وعلى تحريك عجلة الاستثمار بالمدينة؟!.

"خويا هشام" راك ممثل الادارة الترابية، مفروض يكون عندك الحياد، وغير مقبول انك تدير حلف مع رئيس جماعة ضد باقي الفرقاء، والأخطر من داك شي هو تبقى نتا وعشيرك تتكلمو باسم الوالي التازي..

خويا هشام الواجب المهني كيفرض عليك انك تكون موضوعي فالتقارير ديالك، وتتقيد بالحياد التام، والانتصار للمصلحة العامة ولمصلحة الادارة، وليس لخدمة توجه معين، وراك عارف أن الزمن كشاف.

 لهذا خليو الوالي عليكوم، وما تقحموش سميتو فهاد شي، كولشي عارف ان الوالي التازي مين كان فتطوان و هو ديما ملتزم بالحياد وعندو نفس المسافة من جميع الأحزاب.

نقطة إلى السطر.

- [ ]