محمد العمراني
نهار للي قولنا ان التراكتور فطنجة غادي يضرب فالحيط كنا عارفين علاش، حيث عندو شيفور ما قاشع والو فالسياقة، كيشوف الربيع ما كيشوف الحافة..
دابا آعباد الله، غير قولو لينا واش هاد العمدة الليموري عندو شي مخ كيفكر بيه، واش عارف شنو هي السياسة، او التركيز ديالو كامل على الستيلو للي كيوقع بيه والكالكولاتريس.
آخر التصرفات المتهورة ديال هاد العمدة وللي كتفضح التَّهارْگاويت ديالو، وكتأكد انه لا يجمعه بالسياسة إلا الخير والإحسان هو قرار إغلاق قاعة جماعة طنجة امام فريق مستشاري حزب العدالة والتنمية، للي كانوا غادي ينظمو لقاء يناقشو فيه حصيلة أداء مجلس الجماعة.
الكارثة الكبرى للي كتأكد العشوائية للي كيخدم بها هاد العمدة ان فريق اللامبة كان عمل طلب الترخيص باستغلال القاعة، وخدا الموافقة هادي اكثر من أسبوع، والبارح فالساعة ديال اللقاء كيتفاجأو الناس بإغلاق القاعة بدعوى كاين واحد المذكرة موقعها الليموري كتمنع استغلال القاعة فأي نشاط خارج اجهزة الجماعة! .
وا الليموري، إذا كنتي فعلا وقعتي شي مذكرة كان خصك نهار للي تحط طلب الترخيص خص تخبروهوم بالرفض، ماشي تدير هاد التصرف البليد، وتبين الجماعة كتعشش فيها العشوائية.
خصك تعرف آ الليموري انك بهاد التصرف البليد راك عطيتي كادو واعر لحزب العدالة والتنمية فطنجة، ورديتيهوم ضحايا، وبينتي راسك خايف منهوم..
آجي بعدا ياك ماخايف عندك يكون عندهوم شي دواسا خايبين؟!.
كيفاش فيقتي فالصباح وبان لك تلعب دوز الزعيم للي غادي يواجه حزب العدالة والتنمية فطنجة؟
سبحان مبدل الأحوال، غير قنعنا كيفاش هاد الزعامة؟.
ياك كنتي كتجتمع بزاف د المرات مع سي البشير العبدلاوي، وطلبتي منو فالسر التحالف معاه على أساس تدخل المهندسة كريمة أفيلال لمكتب مجلس المدينة؟.
واش داك الساعة كانوا الاخوان حبايب وكنتي قابل تدخلهوم فالتسيير؟!..
وا الليموري إذا كنتي كتوهم راسك، او بغيتي تربح شي نقاط بالظهور انك قادر تواجه حزب العدالة والتنمية، فخصك تعرف ان المنافسة خصها تكون فنظافة اليد، فإيجاد الحلول لمشاكل المدينة، وتنافسهم فتخليق الادارة ديالك وفطريقة تعاملها مع المواطنين..
و الليموري، خصك تعرف انه ما يمكنش تواجه العدالة والتنمية وكولشي كيهدر على فضائح التعمير للي عطات الريحة من بعيد..
ما يمكنش تواجه العدالة والتنمية وكلام كبير كيدور على شركات التدبير المفوض وعلى الصفقات للي كتديرهم الجماعة..
خصك تعرف انه يستحيل تنافسهم او تحاصرهم بقرار بليد بحال هذا.
راك عطيتيهم كادو كبير، و مبرر باش يلعبو دور الضحية، و المصيبة هو ان ناس اللامبة فهاد 3 سنين كانوا دايرين معارضة "لايت"، دوزو لك معظم القرارات، خلاو الأمور تمشي..
لكن جيتي نتا، و حتى بقات عام على بداية المسلسل الانتخابي عاد عطيتهوم هدية بتصرف بليد غير محسوب..
المهم الله يكون فعون بنت الباشا، تاقت فالليموري وعطاتو يسوگ التراكتور فطنجة، كان الأمل ديالها يحرث المدينة انتخابيا، ساعة الشيفور حرث لراسو وطحن صحابو وطلق التراكتور يمشي للحافة، والنتيجة غادي تشوفوها فالانتخابات الجاية.