محمد العمراني
حنا كنلقاو العذر ن العديد من محبي اتحاد طنجة على الغضب ديالهم من أي واحد كينتقد الفريق، وكنتفهمو دوافع الهجوم للي عملوه البارح علينا فموقع "طنجاوي" ردا على المنشورات للي دوزنا بخصوص خبايا عملية رفع المنع من الانتدابات للي نجح فيه كرطيط رئيس النادي ومدير الشركة فنفس الوقت.
لكن خص نتفاهمو على واحد الحاجة: من حق الجميع يفرح برفع المنع وتمكين الفريق من انتداب لاعبين جدد لتعزيز التركيبة البشرية ديالو، وفعلا هذا إنجاز ضروري نصفقو عليه، خصوصا إذا كان الفريق عليه أحكام نهائية، تتجاوز 3 د مليار د سنتيم، وهاد المكتسب كان كيبان من سابع المستحيلات.
لكن واش يمكن يقبل شي واحد يكون رفع المنع على حساب رزق عباد الله، والتحايل على اللاعبين، والتلاعب فالوثائق؟
واش يمكن نسكتو على واحد القضية مهمة بزاف، دابا هاد الجماهير العاشقة للنادي للي فرحانة بكرطيط وكتعتبرو البطل للي نجح فتجاوز اكبر عائق كان كيهدد مستقبل الفريق، شنو غادي يكون رد الفعل ديالها إذا بانت الحقيقة واكتشفت ان رفع المنع تم عبر التحايل والتهديد والتزوير، وما كاين لا كرطيط البطل لا سيدي زكري؟!
سي كرطيط
المشكل ديالك هو الطموح الجنوني للي عندك، ومستعد تعمل أي حاجة، كنكرر أي حاجة باش تبقى عضو فالمكتب المديري للجامعة بجانب لقجع، للي الجميع عارف انك كتستعمل إسمو باش تفرض راسك فعدة مواقع، وعلى اية حال هاد الخصلة ديال الزعامة معروفة عليك، و هي للي وصلاتك من بائع بسيط لمعدات الهواتف بيلحيكا إلى احد كبار حيتان العقار بطنجة وربما المغرب، اللهم لاحسد والله يزيدك.
لكن توصل بيك الزعامة لدرجة التحايل على القانون واستعمال النفوذ والضغط باش تفرض الأمر الواقع على اللعابة، وتخاطر بسمعة الفريق وبمستقبله أيضا، فهادي ما يمكنش نسكتو عليها، لأن السكوت هو تواطؤ ضد مصلحة الفريق.
وهنا سأطرح سؤال: سي كرطيط ماذا لو تأكد أنك استعملتي وسائل تدليسية لرفع المنع، فالأكيد ان لقجع لن يرحمك ولن يرحم النادي، وغادي تكون عقوبات قاسية تقدر تجيب الفريق رميم، حيث لقجع غير مستعد يدافع على شي واحد مهما كان يمكن يسيئ لصورة المكتب الجامعي فهاد الظرفية الحساسة للي كتعيشها بلادنا كرويا.
سي كرطيط،
عندك يجيب لك الله انك محمي بالشبيحة ديالك للي متخصصين فالسب والقذف والهجوم على اي واحد كيفكر ينتقدك، راك واهم آ عيزي كرطيط.
هاد الهجوم مغادي يجيب حتى نتيجة، ولذلك عندك حل واحد، هو تقول الحقيقة وتجاوب على هاد الاسئلة:
* شحال خلصتي ديال الفلوس لتسوية النزاعات مع اللاعبين؟
* واش فعلا المبلغ هو 750 مليون من أصل ما يفوق ثلاثة د الملاير ونص؟
* شحال ديال الفلوس عطاتك الجامعة وشحال ديال الفلوس جمع لك السيد الوالي من عند المنعشين العقاريين؟.
الجواب على هاد الاسئلة غادي يبين واش فعلا عندك الحب والغيرة ديالك على الفريق، وقادر تضحي او انك وفي للمنهج ديالك فالحياة: من زيتو قليه..
مكرهناش طنجاوا يعرفو من نهار خديتي الرئاسة شحال ساهمتي مع الفرقة من مالك الخاص؟.
ويدا بغيتي تكون شفاف قول لنا من نهار طلعتي عضو فالمكتب الجامعي شحال المبالغ للي دعمتي بها الفريق؟..
ونقدر نقولك ساهمتي بلفتاوت مقارنة مع الارباح للي جنتيها من وجودك عضو فالمكتب الجامعي.
الشفافية هي مكمولة، ماشي تعمل بلاغ استعراضي على مداخيل مباراة وحدة د اتحاد ومن بعد ضربتي الطم.
سي كرطيط،
عشق الفريق هو الإشادة بالنتائج والقرارات للي فمصلحة الفريق، ولكن فنفس الوقت هو فضح اي اختلالات لان السكوت عليها خيانة للنادي.
ولذلك باش نهبطو الريدو على ملف رفع المنع بغيناك تخرج للرأي العام ببلاغ توضح فيه جميع المعطيات المتعلقة بالنزاعات مع اللاعبين وترد على التصريحات والشكايات ديال اللاعبين للي كيقولو انهم ضحية تلاعب بالملفات ديالهم.
اما تبقى ضارب الطم وداير سياسة النعامة لعل وعسى تدوز العاصفة وتضمن عضويتك فالمكتب الجامعي، فهاد شي غادي يكون على حساب سمعة ومستقبل الفريق.
يالله بان آ المجتهد.
