محمد العمراني

طنجة مقلوبة هاد الايام بسباب اتحاد طنجة، الروينة نايضة على رفض كرطيط رئيس اتحاد طنجة قبول لائحة المنخرطين للي نصفهم القضاء، وصدر حكم تنفيذي لصالحهم، لكن سي كرطيط لا يرى حرجا في تحفير مقرر قضائي صادر باسم جلالة الملك!.

واش كرطيط عندو شي نفوذ كيحتمي بيه، وكيخليه فوق القضاء، هذا موضوع غادي يجي وقتو..

ما علينا، نرجعو لقضية لائحة المنخرطين، ونشرحوها باالخشيبات.
الجمع العام للي دعا ليه الشرقاوي يوم 13 شتنبر 2024، توصل بالدعوات 147 منخرط، وتم تأجيل الجلسة الاولى لعدم توفر النصاب حيث حضرو فقط 66 عضوا، ومن ضمن الحضور كنتي نتا آسي  كرطيط.

فالجلسة الثانية يوم 28 شتنبر 2024 نفس عدد المنخرطين توصلوا بالدعوات، والجمع العام انعقد لتوفر النصاب بناء على 147 منخرط، وتم التصويت على استقالة الرئيس، والمنخرطون رفضو مقترح تقدمتي بيه آ سي كرطيط حيث بغيتي تسير الفرقة بلجنة مؤقتة، وهادوك المنخرطين انتخبو لجنة ثلاثية للتحضير لجلسة انتخاب المكتب، مشكلة من عبد الحنين العراقي، وعبد الحكيم شريف، وبسام العاقل.

فالجلسة الثالثة جابو واحد التخريجة جديدة، وهي الرجوع لقائمة 54 منخرط للي كانت معتمدة فعهد الرئيس أحگان.

هادوك الناس للي تقصاو آسي كرطيط فيهوم نوعان:
النوع الاول سمع منك ومن الناس ديالك ان الوالي ولقجع هوما للي باغيين تكون نتا الرئيس، هادو  رجعو اللور ومابغاوش يحتجو على الإقصاء ديالهوم، والمجموعة الثانية وللي هي الاغلبية فضلو ما يجيوش باش ما يتحسبش عليهوم انهم كيعرقلو او كيشوشو على الفرقة.

إذا آسي كرطيط قانونيا وأخلاقيا إذا رفضتي هاد اللائحة ديال المنخرطين راك كتحكم على راسك ان الانتخاب ديالك غير شرعي. وغادي تبان انك خايف، وباغي تسيطر على الفرقة بأي وسيلة، ولو بالتهديد.

دابا ندوزو لقضية كولشي كيهدر عليها هي الاختباء ديالك وراء الوالي التازي ورئيس الجامعة فوزي لقجع، حتى وليتي معروف فطنجة ب "الوالي اتصل بيا"، "لقجع قال لي".

للي كيعرف الوالي التازي كيعرف انه طيلة الفترة للي دوزها فتطوان ديما كان عندو مسافة من الشأن الداخلي لفريق المغرب التطواني، كيعاون بدون تدخل فشكون يكون الرئيس وشكون يكون فالمكتب.
فوزي القجع الجميع كيعرفو انه معندو لا ناقة ولا جمل باش يطلع فلان أو فرتلان.

ولهذا باش نشدو هاد القوس بصفة نهائية غادي نطرح عليك بعض الاسئلة:

1- واش الوالي التازي اتصل بيك وسولك على شنو واقع فالاتحاد وقولتي ليه نعام آس الشرقاوي هو مول هاد الفتنة

2- واش تلقيتي شي اتصال بعد ذلك من شي جهة وطلبت منك تنزل شكاية يوم غد الاثنين حول التسيير المالي د الفرقة فالفترة ديال الشرقاوي؟!

هاد شي للي كيروج فالمدينة، وكينسبوه ليك آ سي كرطيط راه خالق ضجة كبيرة فالمدينة، علما ان للي بعقلو وعارف بلادنا كيعرف ان هاد شي غير السرافح وتبياع العجل، ومحاولة الظهور بمظهر الشخص النافذ المحمي من لفوق.

ولذلك آسي كرطيط، خطي عليك الوالي التازي وقوزي لقجع، وخليهوم بعاد على هاد الصراعات الداخلية، وإذا باغي تصفي حسابك مع الخصوم ديالك فالفرقة خلي المسؤولين د البلاد فالتيقار.

سي كرطيط،
مزيان تدير افتحاص التدبير المالي لشي مسؤول تصرف فمالية اتحاد طنجة، هذا كيأكد الحرص ديالك على الشفافية.

غير هو نسيتي واحد الحاجة:
الشفافية مفهوم لا يتجزأ، وما كنجبدوش الشفافية باش نضغطو على الخصوم، ولذلك قبل ما تتزايد على الناس بدا براسك:
 دير افتحاص على الفترة للي دوزتيها رئيس على الفريق وعلى تدبيرك للشركة الرياضية،  وكيفاش تصرفتي فالملاير للي توصلتي بيها.

ملاحظة أخيرة،
 أنا معجب بالمسار ديالك آسي كرطيط، نتا شخص عصامي ما فيها شك،  مكرهناش تتكرم وتحكي قصة نجاحك من يوم دخلتي لطنجة قادما من أوروبا حتى اليوم، باش الشباب يقتديو بالمسار ديالك الناجح، وللي فالحقيقة خصو يتقرى في أرقى معاهد الاقتصاد والتسيير والاستثمار وليدر شيب.

ما تكونش أناني آسي كرطيط وتحرم الناس من قصة نجاحك، راك وليتي قدوة محليا ووطنيا.