محمد العمراني

عند انفرادنا في موقع "طنجاوي" بالكشف عن فضيحة إدراج امانديس اسم محمد امحجور ضمن فئة كبار الشخصيات، طرحنا سؤالا صريحا وواضحا: هل استفاد الرجل النافذ والعمدة الفعلي لمدينة طنجة من اي امتيازات او تسهيلات بموجب وضعيته ال_ (VIP)؟. 

لكن يبدو ان امحجور والشركة المكلفة بتدبير قطاع توزيع الماء والكهرباء لزما الصمت، واختارا ممارسة سياسة العامة.

امام هذا الوضع، نجد أنفسنا مضطرين لكشف الجزء اليسير من جبل الامتيازات التي يحضى بها هاد المفشش ديال امانديس، وما خفي كان اعظم. 

سي امحجور نعام ٱس كيخلص الفواتير فوقاش ما رشقاتلو، ويتوقف عن الاداء الفترة للي بغا، وماكينش للي قلق راحتو، أو يجيب لو إنذار او قرار بقطع التزويد بالما والضو، ابدا، حيث سي امحجور محسوب مع الناس (VIP)!.

وحيث أنه مفشش بزااف عند امانديس، فإنها لم يسبق لها ان طبقت في حقه مسطرة قطع التزويد بحال للي كتعمل مع باقي المواطنين من جميع الشرائح (فقراء، موظفين، اغنياء..).

نعطيكم دليل موثق على هاد الكلام للي كنقول، ففي شهر ماي المنصرم كان سي امحجور فالذمة ديالو 18 فاتورة بلا خلاص، يعني سنة ونصف،(من شهر 11ديال 2019 حتى لشهر 4 ديال 2021 ).

ييه نعام ٱس، عام ونص وهو مفطح مع راسو، يفتح الروبيني ينزل الما، يبرك على البريز يشعل الضو. 

السؤال: شكون هو هاد امحجور باش يخلص فوقاش ما بغا، ويتعطل شحال ما بغا، وأمانديس دايرة عين ميكا؟!. 

دابا نتصورو لو كان شي مواطن ماخلصشي 18  فاتورة، علما انها مستحيلة توقع، ولكن نتصورو هاد الحالة، بالتأكيد امانديس غادي تمشي معاه بعيد، تلغي الاشتراك وتسحب عداد الضو والما، ويمكن تبعو فالمحاكم. 

فالحقيقة ٱسي محمد عندك سنطيحة قاسحة بزاااف، ولسانك طويل بالهدرة الغليظة، وكتعطي الدروس فالعفة والنزاهة و المصداقية، والدفاع على مصالح المواطنين، ونتا غير وصلتي نائب عمدة مكلف بملف أمانديس، اول إنجاز هو تخلص الضو و الماء فوقاش مارشقاتلك.. 

ياك ٱسي امحجور، ماحشمتيش؟!

الناس صوتت عليك وتاقت فيك، وتاقت فشعار "صوتك فرصتك لمحاربة الفساد"، وكان الامل ديالها تدافع على مصالحهوم، وتحميهوم من جبروت الشركة، ساعة سمحتي فيهوم، واستغليتي الأصوات ديالهوم وركبتي على التفويض الشعبي باش تولي نتا المرضي ديال أمانديس. 

دخلت عليك بالله ٱسي المناضل، واش كتنعس مرتاح البال، فالوقت للي نتا ماكتضربش الحساب لفواتير الضو والما، كاين الهجاجل وكاين الاسر الفقيرة كتمشي تتسلف وتخلي ولادها بجوع باش تخلص الضو والما؟!!. 

سؤال ٱخور: واش خيي والصمدي وافقير وفاطمة وبوزيدان وبنعبود ووو، حتى هوما محسوبين ضمن فئة كبار الشخصيات؟!! 

بالتأكيد لا، وأمانديس هي للي عارفة علاش، حيث كلهوم فكفة وامحجور فكفة أخرى ثقيلة عليهوم مزيان، وهي للي عارفة السر والحكمة.

الحاصول،

راك مازدقتيش ٱ الفهيم..