محمد العمراني

اليزيد أيناو وما ادراك شكون هو اليزيد ايناو، الرجل القوي والنافذ بجماعة طنجة، والعلبة السوداء المتحكمة في أسرار مالية الجماعة، والذي ظل صامدا في منصبه لمدة 19 سنة( اللهم لاحسد، والله يزيد ويبارك)، يكفي ان يعرف الجميع انه عايش خمس رؤساء او "عمدات": سي الدحمان الدرهم، وسي سمير عبد المولى، وسي فؤاد العماري، وسي البشير العبدلاوي، ثم حاليا سي منير الليموري، للي دوز العام الاول من الفترة الانتدابية ديالو، وكلهم سبحان الله تشبثوا بيك، وما قدروش يستغناو عليك..

اليزيد كيستحق فعلا انه يدخل لموسوعة "غينيس"، باعتباره اقدم مسؤول على مالية جماعة ترابية فالمغرب، وهو على بعد سنة واحدة باش يحتفل بالذكرى العشرين لتحكمه الشامل في جبايات ومداخيل جماعة طنجة، وهادي مناسبة باش نقترح على صديقه العزيز والحميم العمدة الليموري، بصفته رئيس الجمعية المغربية لرؤساء الجماعات الترابية، باش يدير تكريم وطني كبير لسي اليزيد اعترافا بكفاءته وخبرته الناذرة، والذي يجب ان يتم تعميمها وتسويقها بمختلف الجماعات الترابية.

طبعا باش يحافظ مسؤول على المنصب ديالو طوال هاته السنين، خصوصا إذا كان منصب حساس، فضروري يكون شخص كفؤ وعندو ما يقول، وهذا إن دل على شئ إنما يدل (زوينة هاد العبارة) على أن الشخص معندوش مع الخواض حاشى لله..

والدليل هو التدبير ديالك الصارم للرسم المفروض على الاراضي العارية، تبارك الله عليك الفرنك ما يزهق، والغرزة ديالك متقونة.

لكن هاد النفوذ وهاد القوة وهاد الدهاء وقوة الشخصية للي عندك اليزيد وصلات لسوق الجملة للخضر والفواكه بطنجة وتسالات..

كيفاش؟

كولشي كيتساءل كيفاش ساكت على الفضائح وسوء التدبير للي كاينة بهاد المرفق، وللي الجميع كيعرف انه الدجاجة التي تبيض ذهبا في جيوب بعض المحظوظين.

العجب هادا!!.

واش اليزيد للي الجميع كيشهد لو بالذكاء الخارق والدهاء يفلت لو الخيط فالمارشي؟ 

غير قول لينا شنو واقع وعلاش ماقادرش تتدخل باش تطبق القانون، وتوقف مثلا لوبي الصناديق الفارغة عند حدو، للي كيغرف ملايين الدارهم مقابل الفتات للجماعة، بغيناك تشرح لينا كيفاش داير عين ميكا على مدير المارشي، للي كولشي عارف انه عزيز عليك، ونتا وصاحبك للي عندو كونطرا ديال التمديد، للي دافعتو عليه باش يشد هاد المنصب رغم ان التكوين والمؤهلات ديالو ما كيسمحوش باش يكون فهاد البوسط، ونتا عارف انه عاجز يوجد تقرير واحد على المارشي، بل يستحيل يكتب فقرة وحدة ..

 ٱسي اليزيد، واش ماعرفش الخواض للي كاين فالنظام المعلوماتي، واللعيبات ديال الديكلاراسيون، والسلعة د لانپور مع السلعة د المغرب، وزيد وزيد، وللي فتح فمو يعرف!!!. 

هاد شي كامل ماعرفوش؟، راه نتا للي فصلتي دفاتر التحملات على المقاس، ونتا للي كتعرف الدبانة فالمارشي من خصها تدخول ومين خصها تخرج؟!!!.

شوف راه واخا الشيطان مرة مرة كيوسوس لينا بشي حاجة، كنقولو لو الله ينعلك ويخزيك، سي اليزيد راجل نزيه ومعندوش علاقة أبدا بهاد الخواض، لا من قريب ولا من بعيد، واخا كولشي عارف ان المدير د المارشي، للي ما يكتفرقشي مع اباطرة هاد المرفق، عزيز عليك، و كيموت منك بالخوف، ويستحيل يمشي خطوة وحدة بلا إشارة منك، لكن رغم ذلك انا كنقول اليزيد بوحدو والبلغيتي بوحدو، وكل واحد كيتعلق من فرقوشو!!!.

هذا راه اليزيد، ماشي اللعب!!!

لكن واحد الحاجة للي خصك تشرح لينا ٱسي اليزيد، وهي المجهود الخرافي للي درتيه باش توقف عملية مراجعة امتياز الصناديق الفارغة للي كان المجلس باغي يناقشها، كولشي عارف انك انتحرتي، ما خليتي ماعملتي، وباش تعرف راسك مجهد، فقدرتي تقنع العمدة الليموري، باش ينخرط معاك فالحرب على المطالبين بفتح ملف الصناديق الفارغة..

عندك تنكر وتقول راه معندك علاقة بالموضوع، كولشي عارف بمن اتصلتي وشنو قولتي، وكيفاش قدرتي تعمل انقلاب فالمجلس لفائدة لوبي الخاوي.

زعما افراد هاد اللوبي بقاو فيك حتى لهاد الدرجة؟! 

الخلاصة سي اليزيد:

 إذا كان هاد المارشي الامور فيه صافية ناضية، وحنا كنتعداو على المدير، وكنظلمو لوبي الخاوي، وإذا كانو الوكلاء والتجار كولهوم كيتطبق عليهوم القانون سواسية، غير قولها ٱ خاي اليزيد والله حتى نتيقوك، الكلمة ديالك ماتعاودش و متطحيش الارض، راك مْعلّم ومهندس وخبرة وداهية يا الشديد يا الواعر..