محمد العمراني

نهار على نهار كيتأكد ان حزب الأصالة والمعاصرة حصل حصلة خايبة فمدينة طنجة، حين قرر ينصب منير الليموري عمدة على مدينة عندها مكانة خاصة عند سيدنا، ناهيك على كونها ثاني قطب اقتصادي فالمملكة.

السيد من فضيحة لفضيحة أبشع منها، يكفي انه ولى أضحوكة لدى الرأي العام الوطني مين عطى جواب كلو استهتار واستفزاز لمشاعر المواطنين حين سولو الصحافي على المجازر للي كترتكبها اسرائيل فحق الشعب الفلسطيني، السيد بدا كيكركر ( خليتيها متورخة آ الباشا حورية)، وقال " آش دخلنا فغزة"..

الله الله على عمدة طنجة وعلى رئيس رؤساء الجماعات بالمغرب.

فضيحة اخرى تورط فيها عندما قرار تنصيب محامي الجماعة فملف دعوى إفراغ ساكنة حومة الشوك، دابا هاد العمدة واش نورمال مع راسو؟ واش عارف شنو كيدير؟

كيفاش كتنصب محامي ديال الجماعة فقضية جماعة طنجة ليست طرفا في القضية. هذا نزاع بين شركة خاصة ومواطنين حول احقية عقار متنازع عليه.

غير قول لينا اسي منير كيفاش درتي لهاد الزبلة، وشمن قانون استندتي عليه باش تنصب محامي الجماعة فهاد القضية.

آسي منير غير قول لينا معامن كاتستاشر؟

آسي الليموري راك عمدة ديال مدينة طنجة ماشي صاحب مصنع للأحذية، راك ياحسرة نتا الواجهة والفيترينة ديال طنجة، والممثل ديال الساكنة د المدينة.

نشرحو لك بالخشيبات:

الجماعة ما يمكن تدخل فشي نزاع قضائي إلا اذا كانت طرف فيه، سواء مدعية او مدعى عليها، وفهاد القضية الارض محفظة فاسم واحد الشركة والناس ساكنين فيها هادي اربعين عام، وعندهوم العقود والوثائق ديالهوم، آش دخل الجماعة فالموضوع؟..

لكن نتا فكرتي حدا نيفك، بغيتي تركب بأي طريقة، بان لك تنصب محامي مخلص من عند الجماعة!..

المصيبة ان ساكنة حومة الشوك رفضت التنصيب ديالك، وقطعت عليك الطريق لانهم عرفوك انك باغي تستغل الموضوع ديالهوم باش تعمل بيه السياسة.

بغيتي تدير السياسة وتركب على الموجة باش تربح صويتات ياك؟

إيوا اللا آسي منير ماشي هيدا الله يرضي عليك..

كنتي تقترح وساطة مثلا، كانت تكون عندك الشجاعة وتعمل نزع الملكية وتخلص المالكين وتفوت الارض للسكان القاطنين، او أضعف الإيمان كنتي تكلف شي محامي من مالك الخاص ماشي من المال العام.

فوق هاد شي كامل، هاد الموضوع مين تفرگع وبغاو يركبو عليه شي وحدين للي الهدف ديالهوم هو زعزعة الاستقرار (حتى نتا بغيتي تركب على الموضوع انتخابيا) ناضت الدولة تحركت وخذات التدابير اللازمة باش تلقى الحل للي كيضمن الحق ديال الساكنة باش تبقى فالمنازل ديالها، والدولة قادة بشغلها.

خلاصة الامر، حصلة وشمن حصلة هادي معاك.

المهم، تبارك الله على السي العمدة، آ الرئيس د الرؤساء د المغرب وخلاص .. ولكن شنو غادي نقولو: المقص ديال 8 شتنبر هادي الفصالة للي خرج.