محمد العمراني
البارح اهتزت مدينة طنجة على وقع فضيحة كبيرة بزاف عرفها سوق الحولي للي دايراه جماعة طنجة بمناسبة عيد الاضحى، بعدما حاول شي مسؤول على تدبير السوق، مع الفجر، يضربها بسلتة ومعاه 80 مليون سنتيم، لكن الخدامة واعوان الحراسة حاصروه، وطلبو منو باش يخلصهم في الخدمة ديالهوم، مما اضطرّ الشرطة تتدخل.
الغريب فالأمر ان جماعة طنجة ضاربة الطم وبلعت اللسان ديالها، وكأن الأمر لا يعنيها.
لكن الخطير فالأمر، هو مين بحثنا فهاد الموضوع اكتشفنا معطيات ماشي هي هاديك، وتثير الكثير من الغموض والشبهات.
أول حاجة ان السيد للي كلفاتو جماعة طنجة باش يسير هاد سوق الحولي، ما كاين حتى وثيقة تفيد اي علاقة تعاقدية بين الطرفين، بمعنى ان الجماعة خلقت مرفق جماعي جديد، وكلفت شخص بالتسيير ديالو دون دفتر تحملات ولا طلب عروض ولا والو، وبالوضوح الكامل كولشي داز حسي مسي.
ومين زدنا بحثنا فهاد الموضوع اكتشفنا ان الشخص المحظوظ بهاد " الهمزة" للي سمينة بحال شي دنفيل، هو للي فاز بصفقة تدبير سوق الماشية للي دارتو الجماعة شحال هادي وفق المساطر القانونية المعمول بها.
هنا كنطرحو السؤال، علاش العمدة ومعه نائبه الاول بحكم التفويض للي عندو، عطاو لهاد السيد هاد الهمزة للي فيها لعاقة كبيرة بدون اي وثيقة، وبدون ما يدخول لصندوق الجماعة اي سنتيم، مع العلم ان هاد المحظوظ كيفرض مبالغ طائلة على الكسابة باش يسمح لهوم يبيعو الحولي ديالهوم فهاد السوق؟!!
هاد الشبهات تستدعي من جماعة طنجة تخرج توضح للرأي العام ملابسات هاد القضية، وتجاوب على الاسئلة التالية:
١- شنو هو الإطار القانوني للي كينظم هاد عملية تفويت سوق الحولي طبقا للقانون التنظيمي 113.14؟
٢- علاش ما تعملش طلب عروض ويكون تدبير هاد المرفق فيه المنافسة؟
٣- شحال ديال الفلوس دخلت لجيوب هاد المحظوظ من هاد الهمزة للي عطاتو الجماعة؟
٤- شكون كيخلص استهلاك الماء والكهرباء ديال هاد المرفق طيلة فترة الاشتغال ديالو؟.
حنا عارفين ان العمدة ما مسوقش لشي حاجة سميتها التواصل مع الصحافة والانفتاح على الرأي العام، هو متخصص في مهام أخرى أهم وأنفع بكثير، ولذلك فالأنظار متوجهة لمحمد غيلان النائب الاول للعمدة، والمفوض له الجبايات والأسواق واحتلال الملك العمومي إلى جانب تفويضات أخرى، باش يخرج للرأي العام ويوضح شنو واقع فهاد القضية، وكولشي كيعرف ان سي غيلان عزيز عليه التدخلات، ويجيد فن الخطابة، وسبق لو في مناسبات سابقة ان عطى العديد من التصريحات حول التنظيم الجيد لسوق الحولي لهاد السنة.
ملاحظة أخيرة على سبيل الختم:
بغينا نفكرو سي غيلان بالانتقادات الحادة للي وجهها لطريقة تفويت سوق الحولي فالسنوات المنصرمة، وللي كان كيتكلف بها واحد الشخص سوسي الأصل، وأعتبر حينها سي غيلان ان الأمر يعتبر فضيحة، وفيه إهدار للمال العام، يستوجب المساءلة القانونية.
شنو تبدل بين البارح واليوم حتى انقلبت قناعات سي غيلان 180 درجة. التفسير الوحيد الممكن هو ان الرأي السابق ديال غيلان كان مقتنع به غيلان مين كان تحت تأثير سياسة المقاهي والمعارضة الخاوية، ولكن من بعد الاستقرار ديالو فالطابق السابع بجوار الماسك بمفاتيح قصر البلدية، يمكن صبحت الصورة لديه اكثر وضوحا، أخذا بعين الاعتبار المعطيات والوثائق والمستندات التي أصبح متاحا له الاطلاع عليها.
ملاحظة ثانية لها علاقة بالأولى: بغينا بلاغ رسمي او تصريح مسؤول، آسي غيلان، ماشي عاود تهجمو علينا فالواتساب وفالفيسبوك بحال للي كانوا كيديرو معاك قبل ما تدخل لدار أبا سفيان، وتصبح آمنا و من المشمولين بالعطف والحصانة.
