محمد العمراني

لا حديث هاد الايام داخل بناية قصر بلدية طنجة إلا عن قرب العودة الرسمية ديال نور الدين البدراوي، المدير العام السابق د المصالح، لموقع القرار بجانب العمدة الليموري من بعد ما خرج تقاعد هادي عام.

وحسب المعطيات الموثوقة، فإن الليموري وقع قرار بتعيين البدراوي عضوا في ديوانه، و القرار مشى لمصالح وزارة الداخلية من اجل المصادقة عليه.

علاش كنقول العودة الرسمية، لان البدراوي واخا خرج تقاعد هادي حوالي سنة، ديما بقى هو الشخص النافذ ومحور القرار في جميع الملفات، خاصة ذات الوزن السمين، والدليل على هاد الكلام، أن البدراوي من نهار تقاعد عطاه الليموري مكتب خاص فواحد الفيلا فحي السوريين، للي هي المقر ديال مجموعة مؤسسة البوغاز المكلفة بتدبير وتتبع جميع القطاعات للي كيان تسييرها بنمط التدبير المفوض فإقليم طنجة - أصيلة ( المطرح العمومي، أمانديس، الطوبيسات د ألزا).

ومن نهار دخل البدراوي لهاد الفيلا، أصبح التسيير د يال جماعة طنجة يتم من فيلا السوريين، وأغلب الملفات كانت تنقل إلى البدراوي لدراستها، قبل ما يجي الليموري ويعقد اجتماع مغلق مع البدراوي باش يتخاد القرار النهائي.

كاين للي غادي يسول على شفيق الصنهاجي، المدير العام د المصالح الجديد للي خلف البدراوي، وللي بدا المهام الرسمية ديالو في يناير 2023، فالجميع يعرف ان التعيين ديال الصنهاجي كان شبه مفروض على الليموري، خاصة بعد ما رفع الوالي مهيدية كارطة حمرا فوجه البدراوي، وفرض على العمدة باش يدير مباراة لتعيين مدير مصالح جديد. وحيث ان الصنهاجي إطار عال بولاية طنجة، فالليموري ديما اعتبرو شخص ديال الولاية، وبالتالي بقات المهام ديال شفيق محصورة فالتدبير الإداري اليومي، أما الملفات السمان الغلاظ ما كيعرف عليها والو، وحتى بعض الموظفين للي عندهوم حظوة خاصة، ديما بقات كاتجيهوم التعليمات من فيلا السوريين، وما شي من الطابق السادس د قصر البلدية.

لكن بعد رحيل الوالي مهيدية، بدات خطة الليموري في تضييق الخناق على الصنهاجي المدير العام للمصالح، وبداو العراقيل، والتهميش في أفق دفعه باش يطلب الإعفاء ديالو، وكيبان أن الخطة يتم تنزيلها بنجاح، حيث جميع المؤشرات تفيد بأن الصنهاجي سيعود إلى مباشرة مهامه بولاية طنجة ابتداء من يناير 2025.

دابا هنا غادي نطرحو سؤال مهم جدا:

علاش الليموري متشبت لهاد الدرجة بالبدراوي باش يبقى فجنبو، وللي قالها هي للي تكون، ومن شبه المستحيلات الليموري يحط توقيعو على شي ملف ثقيل وعندو قيمة بلا الموافقة ديالو. يكفي نعرفو ان جميع الاجتماعات المهمة تعقد بفيلا السورين و لازم يكون فيها البدراوي ( ملف صوماجيك، التعمير، الصفقات، امانديس وزيد وزيد..)، يمكن حيث فيلا السوريين فيها الهدوء وكتساعد على الركيز وعلى الإنسان يحسب مزيان قبل ما يحط السينياتور ديالو!..

(عاود سيرو مسحو الأرشيف ديال الكاميرات د فيلا السوريين باش ما يبقاش الأثر ).

من خلال البحث للي درناه والمعطيات للي جمعناها باش نعرفو سر هاد الارتباط الوثيق بين الشخصين تأكد لدينا، ان 90 يوم الأولى ديال الليموري فقصر البلدية( اكتوبر نونبر دجنبر 2021) كانت حاسمة، وفيها أظهر البدراوي كفاءة يستحيل ان ينافسه فيها أحد، وهو للي عطى الاسرار وخارطة الطريق للعمدة الليموري باش يقرر فالملفات الثقيلة، ويفلت من الفخاخ المنصوبة ويتفادى الكاميرات الموجهة للطابق السابع، وأيضا باش يعمل لغشاوة على البلالط للي حاضية شنو كيوقع فالطابق السابع، وفعلا شاف الليموري بعينو الدليل الملموس لكفاءة البدراوي، ومن ذاك الوقت تعاهدو باش يبقاو ثنائي، كيجمعهوم الوفاء والإخلاص لبعضهم البعض، و مادام الليموري عمدة على المدينة، فالبدراوي لابسو.

دابا مين عرفنا السر، غادي نتسناو كيفاش غادي يسالي فيلم منير ونور الدين.

المهم آ الليموري كل نهار كتأكد أنك مفخرة التراكتور فطنجة وخلاص.