محمد العمراني
آشنو هاد السيبة وهاد المنكر للي واقع فطنجة؟!
واش ما كاين قانون فالبلاد، دابا كيبان بالدليل القاطع ان بعض المسؤولين فهاد المدينة العزيزة على سيدنا ولاو كيديرو ما بغاو فهاد المدينة حيث متأكدين انه ما كينش للي يهدر معاهوم، وما كين لا محاسبة لا والو.
آخر الفضائح هي داك شي للي وقع ففضاء الرميلات، والأبطال ديالو هوما غيلان الغزواني النائب الاول ديال العمدة ومعاه هشام صنيب الباشا ديال المدينة، هادو آسيدي وصلات بيهوم الزعامة لدرجة انهم خربقو فمشروع تقدم امام سيدنا، يتعلق الامر بتهيئة ساحة الرميلات، و للي كان سيدنا عطى انطلاقة الأشغال يوم 26 مارس 2014، وللي بغى بتأكد يرجع لأرشيف وكالة المغرب العربي للأنباء.
الجرأة وصلات بالباشا هشام والنائب الاول ديال الليموري غيلان الغزواني انهم يحَوّْلو لاكاب ديال الدروج د فضاء الرميلات لجوج محلات مجهزين على أعلى طراز، باقي خصهوم غير التصنيف ديال وزارة السياحة، وعاد بيناتهوم طيراسة عامرة بالطوابل والكراسة.
لكن الإخراج ديال هاد الفيلم كان مفروش، والسيناريو بليد.
نبداو بسي غيلان الغزواني:
كيفاش درتي ليها آ الشريف، واش هذا هو تسيير الجماعة بمنطق مقاولاتي، هادي راها السيبة والمنكر.
نتا وقعتي رخصة ديال استغلال فضاء تحت الدرجين د منتزه الرميلات، لبيع الحلويات والساندويشات الجاهزة، وبقدرة قادر صبحت رخصة د الكروسة جوج محلات، مقشدة ومطعم وبيناتهوم طيراسة!.
عارف الجواب ديالك آ سعادة النائب الاول، غادي تقول عندك الموافقة ديال السلطة، هاد المبرر ما واكلش، لان السلطة كتقولك "لا أرى مانعا"، و نتا هو المسؤول على تدبير استغلال الملك العام طبقا للقانون الجاري بها العمل، ونتا تبارك الله عليك عندك تجربة وكتعرف الملفات للي فيهوم الدغل، فما يمكنش تقول انك عطيتي رخصة ديال كروسة، والسلطة هي المسؤولة على المراقبة، راك آ الشريف الموظف ديالك كيخرج يعمل المعاينة، وديك الفضيحة د الرميلات كانت باينة للجميع.
المصيبة آسي غيلان انك كنتي ديما كتضرب فالطالبة وتقول الجماعة خصها المداخيل، بالله عليك واش منطقي واحد استولى على الملك العام ودار جوج محلات (مقشدة ومطعم) وطيراسة كيخلص 600 درهم فالشهر، بحالو بحال هذاك للي كيبيع الحلوى وكيكس فباب المدارس، فالوقت للي حداه كاين محلات تجارية كراتهوم الجماعة بدفتر تحملات قانوني، والناس كتخلص مابين مليون ومليون ونص فالشهر.
واش كاين شي منكر بحال هذا؟!
نجيو دابا للباشا د المدينة،
خويا هشام راك رجل سلطة المفروض انك تكون حريص على تطبيق القانون، ومن أوجب الواجبات ديالك تحافظ على واحد المشروع أشرف عليه سيدنا.
دابا بالله عليك كيفاش طاوعاتك نفسك تسمح بهاد الفضيحة المدوية، والمصيبة ان هاد المحظوظ الرخصة ديالو دارت فالاطوروت، يالله توصلتي بمراسلة من الجماعة متطلب رأي السلطة فهاد استغلال د لاكاب د الدروج، حتى توقع الجواب ب "لا أرى مانعا"، وهنا نسولوك، جميع الملفات كيتعالجو بهاد السرعة ؟، مستحيل!
ثانيا، هادوك للي عندهوم الرخص د الكراريس ديما كتراقبو الرخصة وتتأكدو واش قانونية ولا ماشي قانونية، وكيفاش آ سي الباشا هاد صاحبنا غندور لبيع الحلويات والمأكولات الجاهزة، واش هي مقشدة ومطعم؟!.
وهادي معيقة بزااااف آخويا هشام!.
حاجة اخرى، شحال من درويش او من ذوي الاحتياجات الخاصة طلب مسكين الموافقة على بحال هاد رخصة الاستغلال فعدة أماكن بالكوموندمون ديالك وكان مصيره الرفض، فشكون هاد للي طلع لو الجوك باش وافقتي لو على هاد الفضيحة.
وآخا آ السيد الباشا، نقولو الجماعة راسلاتك ونتا عطيتي "لا أرى مانعا" على اعتبار المكان ولى مأوى للشمكارة ولا يشكل عرقلة لحركة السير، مزيان.
إيوا كيفاش درتي عين ميكا على تحويل لاكابات ديال الدروج إلى محلين تجاريين، تبناو بالياجور والسيما، وش منك يا زليج، واش منك يا تجهيزات، والطابي بالأخضر باش تدار فيه الطيراسة، هاد شي كامل واقع ونتا ما جايب خبار، فهادي غادي تكون مصيبة، لأنه كولشي عارف انه إذا تحطت شي ياجورة او خنشة د السيما، او غير الصباغة كتكون حاضر، فمستحيل ما تكونش شفتي هاد الكارثة، خاصة انها جات فمشروع دشنو سيدنا، وقريب بزاف للإقامة الملكية!!!.
سؤال آخور آ خويا هشام خربق لي مخي: كيفاش تصاوب هاد المونطاج كامل، وتبناو هاد المحلات والشاف ديالك سي بنعيسى ماساقش الخبار؟!
راه زعما معروف عليه انه كان حاضي الشاذة والفاذة، أنا بعدا صعييييب نتيق ان الرئيس ديالك سي بنعيسى يكون عاق بهاد الفضيحة وخلاها تدوز!!!.
حاجة وحدة للي أنا متأكد منها هو انك كنتي من المقربين ديالو، ومحط الثقة ديالو، فكيفاش خبيتي عليه هاد المصيبة آ خويا هشام؟!.
خلاصة القول،
هاد فضيحة الرميلات كشفات حجم السيبة للي غارقة فيها المدينة، راها وصلات للسطو على الملك العام والتلاعب فمشروع تقدم أمام سيدنا وهو للي عطى انطلاقة الأشغال ديالو، والمطلوب هو فتح تحقيق جدي وترتيب الآثار القانونية اللازمة.
