محمد العمراني

أما بعد،

أنا الموقع اسفله كنعترف لمعاليك على راسي وانا في كامل قواي العقلية أني ما نسوى ما نصلاح، وأنني سبب المشاكل والروينة للي واقعة فالمدينة..

أنا هو للي كيخربق السلوكة وكيشعل العوافي، أنا للي كنكتب باسم مستعار فالصحافة المحلية والوطنية، ويدا بغيتي تزيد حتى الدولية عندك الحق..

أنا هو للي كيحرض الناس يهدرو ويكتبو فالفيسبوك، وأنا للي كيتحكم فالأعضاء باش ينتقدو سي الليموني، راه والله العظيم ما كنت عارف ان سي الليموني مهم عندك بزاف و مشمول بالحماية..

أنا هو العصابة للي زورت وكتزور الشواهد والعقود وكاتسيطر على الأراضي وتعدل ليها التيتر فالمحافظة، اما هادوك صحابي للي كيكتبو عليهوم وحق الله إلى أبرياء..

ونزيد نعترف بهادي، شفتي ديك المقالات للي تكتبات عليهوم أنا موراها باش نتلف الخيوط.. 

أنا كامبو أنا، وكان كيسحاب لي راسي قافز وعايق.. هداك الصداع للي ناض على ديك الساحة المعلومة أنا تصيدت فيه، قولت صافي هادي هي الفتيلة باش تنوض الروينة، من بعد عقت ان ديك الخدمة الفالصو كانت مقصودة، وكانت فخ للمكلخين بحالي، وبسهولة كشفت راسي.

كنعترف على راسي بللي حرضت شي ناس مساكن باش يعطيو شي ملاحظات فلقاءات عامة، حتى لقاو راسهوم مصيدين وجها لوجه أمام العاصفة..

شوف آ معاليك 

أنا هبيل أنا، آ شداني ننتقد الليموني ونهدر على الخروقات وعلى الرخص وعلى المال العام..

آشداني ندخل فالشبقات ديال النظافة وديال الانارة وديال السير والجولان، وديال التعمير، وديال الاستثمار؟!.

هاد شي بعيد عليا ومنفهمش فيه..

آشداني نهدر على البلان داميناجمو، زعما أنا قافز!..

شوف آمعاليك،

وحق مولانا ما كان كيسحاب لي ما عندكش مع المزاح والدسارة، ما كينش التعاتيق، للي جاك فالبلان مشى رميم،

العز آ معاليك، ها بوجور ديالك…

كنعترف انني واحد بنادم داسر وعاجبو راسو، ومع أنا ماعندي أملاك ما عندي استثمارات كنت بحال إلى تايق فراسي انه معندي ما نخسر، وما عندو ما يوقع لي..

ولكن دابا أنا التراب د رجليك، والعفة من الرجال.. ها العار إلى شوف فيا بعين الرحمة، راه خرجت على صحابي.. للي سياسيين صبحو محاصرين ومغضوب عليهوم، وللي مستثمرين المشاريع ديالهوم تبلوكات، وللي موظف كينتظر فين تجيه الضربة، وللي فاعل جمعوي ولى مهمش فالمدينة، وسميتو ممنوع ينطق بها شي واحد..

واش آ عباد الله بعض صحابي ديما معروفين بالصواب والأدب والرزانة وولاد الناس، صبحو متهومين بالشعيل د العافية، و بين عشية وضحاها ولاو من المغضوب عليهم..

للي باغي يستثمر ما كاين غير العرقلة، للي باغي الضو للمشروع ديالو الشركة كتنصحو يمشي يجيب شهاد الرضى من عند معاليك، وللي طالب شي رخصة الوكالة هازة الكلاطة فوجهو وكاتقولو سير قلب على شي طريق باش ترفع الفيتو للي عليك..

الحاصول، لقيت راسي هاز الذنب ديال هاد الناس كاملين، وهوما مساكن معندهوم لا ناقة ولا جمل.. 

وحق الله إلى ديما كانوا كينصحوني باش نوقف هاد التخربيق ديالي، وكيقولو لي كتحماق على المشاكل، وانا كنت بليد، كنجاوبهوم نتوما مالكوم كل واحد مسؤول على راسو، حتى شفت بعيني السيف كيحصد فيهوم واحد بواحد، عاد وقفت على كلامهم.

دابا واخا أنا معروف عليا مُشوِّش وفيا الفعايل، ولكن ضربت فالحيط، و عاد عرفت المعنى الحقيقي ديال قطع الاعناق ولا قطع الأرزاق، ومادام وصلت الأمور لهاد الدرجة، أنا قررت نوجه لمعاليك هاد الرسالة، باش نعترف بذنوبي وبالزبايل للي عملت، وباش نطلب من معاليك الصفح والغفران..

من اليوم:

ما باقيش ندخل فشي شبقات، كولشي زين وواعر.. مالي أنا حمق ننتقد .. ومن اليوم أنا عاطي التيقار للسي الليموني..

خاي الليموني وقع للي بغيتي ومنع للي بغيتي وصرف علاش ما قديتي.. انا ما عمري نقرب ليك..

هاد شي ما بقاش فيه المزاح.. آو الله ما كنت عارف عندك هاد السلطات كاملة.. أنا رفعت الراية البيضة وكنعلن الاستسلام ديالي، وكنطلب الصفح والغفران..

ها العار فللي عندك عزيز آ معاليك إلى ما تعفو على صحابي، راهوم أبرياء، من اليوم ما باقي يشوفوني ولا يسمعو صوتي..

انا ما قاد على ذنوب شي واحد تبقى فرقبتي إلى يوم الدين.. غدا شي واحد يمشي يدير فراسو شي حاجة يبقاو ولادو يلوموني حياتهم كاملة..

أملي معاليك هو تقبل هاد الاستعطاف 

وبه وجب الإعلام

حرر بتاريخه

 التوقيع:

مع التوقع مع ضربتني الفيقة ولقيت راسي كنقطر بالعرق 

آ الله، شنو هاد الكابوس؟ 

 الله اكبر أنا فالمغرب ماشي فمقاطعة ساكسونيا..

الله اكبر، الله أكبر.. عاشت المملكة المغربية الشريفة، وعاش ملكها محمد بن الحسن بن محمد بن يوسف الله وليه.

وحق الله إلى اليوم زدت تأكدت ما معنى ان تكون مغربي والملك ديالك هو محمد السادس الله ينصرو ويعطيه الصحة ويحفظ لو ولي العهد مولاي الحسن..

سيدنا خلانا كمغاربة نفتاخرو بالانتماء ديالنا ونرفعو راسنا، وخلى دول عظمى تتعامل مع بلادنا الند للند..

هاد العز وهاد النخوة و نقبلو اليوم على الحگرة والظلم من شي واحد كيعتبر راسو فوق القانون؟!!

الحمد لله بلادنا فيها القانون، ونهار للي نتأكدوا ان شي واحد فوق القانون كاين الدار الكبيرة، دار الشرفاء، كاين سيدنا للي هو الملاذ وهو الحصن الحصين وحامي الملة والدين، وللي كل مغربي مظلوم كيلجأ ليه مين كيتسدو عليه البيبان..

جمعت الوقفة ودوشت بالما بارد، ودابا أنا راجع لخدمتي، وديما مغربي وأفتخر. 

جمعة مباركة