محمد العمراني

نهار الخميس كان الوالي محمد مهيدية عطى تعليمات قاسحة لرجال السلطة الجدد بضرورة التصدي للبناء العشوائي، طبعا هاد التعليمات خصنا نصفقو ليها حيث فعلا ظاهرة البناء العشوائي عندها تداعيات خايبة على الامن الاجتماعي ديال البلاد.

ولذلك انتظرنا القياد الجدد يبداو ينفذو التعليمات ديال المسؤول الاول فالاقليم، وفعلا واحد القايد جديد تعين فالمحلقة الادارية 10 مكرر، (من الدائرة الحضرية مغوغة)، سميتو ياسر بلقايد، نفذ تدخل، نهار السبت مع الفجر، و هدم جوج بنايات عشوائية، ونهار الاحد زاد هدم بناية اخرى مع 6 د الصباح، رغم ان الدار مسكونة، لكنه قام بطرد العائلة للي كانت ساكنة وريب البناية، وهذا موضوع آخور غادي يجي وقتو.

حتى للآن هاد القايد يمكن نقولو انه بدا السربيس ديالو بحماس، ومصمم يقوم بالواجب ديالو، ولكن آ سي القايد راك عارف أن للي كيبغي ينظف المنطقة ديالو خصو يشطب باب دارو هي اللولة.

كيفاش مشيتي تهدم ثلاثة ديال البنايات ديال مواطنين بسطاء، وخليتي دار عاد سلاها مقدم خدام عندك، نهار الخميس، يعني نهار التنصيب ديالك، والمصيبة ان هاد البناية لاصقة فالبيرو ديالك!.

كيفاش؟

واش مشفتيهاش زعما، غادي تكون فضيحة اذا ما بانتش لك، أما إذا كنتي شفتيها و ميكتي عليها غادي تكون مصيبة أعظم وأخطر، حيث ديك الساعة كتكون كتطبق القانون غير على الدراوش، وكتحمي الأعوان ديالك.

فضيحة أخرى تصيدتي فيها آ سي ياسر، هي انك كيف وصلتي للبيرو ديالك قربتي ليك جوج أعوان السلطة عاد دازو هادي أسبوع فالمجلس التأديبي، بتهمة التستر على البناء العشوائي، كان خصك بعدا تقرا التقارير للي عندك، وتسول ف قسم الشؤون الداخلية شنو هو القرار للي تخاد فحقهم، عاد ديك الساعة قرر واش تعتمد عليهوم او لا.

زبلة ثانية آ سي القايد غادي تزلق فيها، هو أنك طلبتي ترجع شاف ديال المخازنية للي كان تماك قبل من هذا، وللي كان الوالي مهيدية دخلو للولاية، حيث كان متورط فالبناء العشوائي مع واحد القايد سابق، حتى هو هزوه ودخلوه للولاية.

كيفاش دابا، غادي تتحدى قرار الوالي مهيدية وتجيب شخص سبق وتخاد فيه قرار تأديبي؟..

سي ياسر كيبان درتي دخلة عوجة للبيرو ديالك، كان عليك تجمع المعطيات بعدا قبل ما تاخود أي قرار يقدر يكون عندو تبعات قانونية وإدارية على المسار المهني ديالك.

حاجة أخرى قبل ما نختم، كنطلب منك تدير دويرة فالمجال الترابي ديال الملحقة ديالك، وتسول مزيان شنو عندك، راه كاين خروقات كبيرة فالمشاريع المرخصة، وللي اخطر بكثير من بعض البنايات العشوائية، وهنا غادي نشوفو هاد الصرامة للي بينتي مع الدخلة ديالك، واش غادي تستعملها مع اصحاب النفوذ ام غادي تستعرض العضلات ديالك فقط على البسطاء من الناس.

ماتديهاش منا قلة الصواب سي ياسر، وسع خاطرك، ولنا مواعيد قادمة بحول الله.