محمد العمراني
البارح العديد من المواقع الاخبارية محلية ووطنية تناولت خبر له وقع الزلزال، يتعلق بإعفاء أو إبعاد رئيس قسم التعمير بجماعة طنجة، لكن المثير فالأمر أن العمدة الليموري بقى ضارب الطم ولم يسارع الى إصدار أي بلاغ توضيحي ينفي أو يؤكد الخبر؟.
الخبر مزلزل لأنه يمس أهم قسم بجماعة طنجة، والجميع يعرف حساسية هاد المنصب منذ سنوات وخصوصا بجماعة طنجة، ومع ذلك الليموري بقى ساكت، وهو للي موالف يرد على قضايا يمكن نعتبروها عادية!.
المعطيات للي تأكدنا من صحتها في منبر "طنجاوي" تؤكد ان خالد التبالي، رئيس قسم التعمير بجماعة طنجة، منذ انفجار فضيحة المهندس المعماري الزويتني، وهو أصبح قليل الحضور الى الجماعة، وأصبح يقوم بدور تصريف الأعمال فقط، لكن البارح العمدة عقد معاه اجتماع فالصباح، ومن بعدها غادر سي خالد مبنى الجماعة، ومباشرة من بعدها تم الاتصال ببعض موظفي قسم التعمير وخبرهوم يوجدو راسهوم باش يتحملو مسؤولية تدبير هاد القسم بصفة مؤقتة.
المهم هو انه شي حاجة كاينة فقسم التعمير ولا دخان بدون نار، واش إعفاء من المهام أو إبعاد مؤقت؟، الليموري خصو يخروج يوضح للرأي العام شنو واقع، و ما يدفنشي راسو فالتراب بحال النعامة.
لكن السؤال للي كيطرح نفسو هو كيفاش العمدة الليموري خاد هاد القرار فحق التبالي، وهو كان المسؤول المقرب إلى قلبه وعقله، وكاملين عارفين كيف كان العمدة متشبث برئيس قسم التعمير، وكان يرفض بشدة أي مطلب يتعلق بإعادة توزيع المهام داخل قسم التعمير باش ماتبقاش جميع الصلاحيات والقرارات مركزة فيد سي خالد!.
ياك كولشي عارف انه كل صباح كان اول مسؤول كيشوفو الليموري، وكيعقد معاه اجتماع مغلق هو رئيس قسم التعمير، وفالعشية كذلك ومثال، كان هو آخر مسؤول كيشوفو باش يعطيه حصيلة اليوم (طبعا ديال القرارات) عندك شي قلال النية يمشي بالهوم لشي حاجة ماشي هي هاديك.
دابا شنو هو هاد الأمر الجلل للي دفع العمدة الليموري يتخلى على عشيرو بهاد السهولة؟.
مازدقتيش آسي منير، هاد شي للي عملتي والله ما رجولة آ الخاوة!.
ثانيا آسي الليموري، الجميع كيعرف أن مسؤولي الجماعة يمارسون مهاهم تحت المسؤولية المباشرة ديال الرئيس، وبالتالي أي تقصير أو خرق أو إخلال وقع، فالعمدة يتحمل المسؤولية القانونية والسياسية (بلا ما نوصلو للأخلاقية حيث ما عندها وجود فالقاموس ديال شي وحدين). ولذلك كنطلبو من سي الليموري يخرج يهدر مع الرأي العام، حيث هدا قسم التعمير وما أدراك ما قسم التعمير، خاصة إذا كان ديال جماعة طنجة!!!.
علاش كنتعبرو خروج ديال العمدة باش يوضح للرأي العام مطلب ملح؟.
حيت بعض الرخص المهمة جدًا للي كتصدر على قسم التعمير لاتتطلب موافقة اللجنة الثلاثية ( قسم التعمير ديال الجماعة وقسم التعمير ديال الولاية + الوكالة الحضرية)، كتطلب فقط توقيع رئيس التعمير والتوقيع النهائي بطبيعة الحال ديال السيد العمدة، و في اقصى الحالات كان يتم بالنسبة لبعض الملفات الكبرى (المركبات السكنية، المشاريع الكبرى ورخص التلسيم المؤقت للتجزئة ) إعداد محضر شكلي فيه توقيع التقنيين ديال المصالح المتدخلة فالتعمير ، ولكن القرار النهائي كياخدو العمدة مع رئيس القسم.
ولذلك، وأمام هاد الزلزال للي ضرب قسم التعمير، من حق الرأي العام يعرف شحال من رخصة سكن قانونية للي كتتعلق بالعمارات وبالمشاريع الكبرى والمركبات السكنية وحتى قرارات التسليم المؤقت ديال التجزئات، وقعتي آسي الليموري منذ تحملك مسؤولية الرئاسة، طبعا كنهدرو على الرخص القانونية بين قوسين كبيرين، وماشي المزورة للي كتحقق فيها الفرقة الوطنية، وللي بان أنها تتعلق فقط بالدراوش والبسطاء، للي استعملوها في الربط بالما والضو، وللي أصلا الشكاية تعملت باش توجه الانظار نحو الخاوي، وتغطي على العامر، ولكن خصك تتذكر الاية الكريمة للي كتقول "وسيعلم الذين ظلموا أي منقلب ينقلبون".
حنا بغينا نعرفو هادوك رخص السكن القانونية الغليضة والسمينة للي وقعتي، وللي خص فيها تحقيق، وللي كيبان ان فيها الدغل، بحال هاديك ديال السانية، وبحال شي وحدة قريبة لمحل (بيتزا هوت)، ومزال رخص أخرى غادي يجي وقتهموم باش نهدرو عليهوم!..
سي الليموري، هاد سياسة النعامة للي داير، وللي باين أن الهدف ديالك هو تدفن راسك فالتراب حتى تدوز العاصفة، راها ما واكلاش ، حيث العاصفة مزال ما بداتش، هي فقط عاد فالبداية ديالها، ولذلك فيق معانا آسي منير، حين مع هاد الزلزال للي ضرب قسم التعمير فالجماعة ديالك "مش حتقدر تغمض عينيك".
