طنجاوي

واش فضايح الحمامي مغاديش يساليو؟، كل نهار كتبان فضيحة كفس من اللولة. فبعد فضيحة عدم التصريح بموظفي واساتذة المدرسة ديالو لصندوق الضمان الاجتماعي، وبعد فضيحة التلاعب في تصاميم ورخص ديال نفس المدرسة، وللي وقعهوم فظروف مشبوهة رغم ان هاد الوثائق ماشي من اختصاص المقاطعة ولكن من اختصاص مجلس المدينة. 

توصل منبر "طنجاوي" بمعطيات موثوقة ان شركة al madarik، المالكة لمدرسة المدارك الخاصة، واللي الحمامي هو مسير الشركة وممثلها القانوني، لم تقدم تصريحاتها لإدارة الضرائب منذ 2015، ولم تتقدم ببيان حساباتها الختامية منذ ذات السنة.

وهاد شي كيعني من الناحية القانونية أن هاد الشركة مجمدة النشاط ديالها، لكن الواقع هو العكس تماما، لأن المدرسة خدام فيها ازيد من سبعين أستاذ، وكيقرا فيها مئات التلاميذ.

وهاد شي المعنى ديالو ، فنظر القانون، أن المدرسة سرية هادي ثمان سنوات.

هاد الفضيحة كتساءل مراقبي ومفتشي ادارة الضرائب، كيفاش سكتو على هاد الشركة؟ واش حيث مولاها سميتو الحمامي وبرلماني، او عندو شي واحد كيحميه، حيث بزاف هاد شي!.

وهنا لابد وزارة المالية تفتح تحقيق فهاد الفضيحة، وإلا غادي يولي العبث، حيث ما يمكنش مواطن عادي كيخلص الضرائب، و واحد حيث برلماني ما كينش للي يحاسبو، فالوقت للي الدراوش اذا ما خلصوش الواجبات، للجماعة طبعا، (بلا ما يمشي بالكم بعيد)، والله لا وقع الحمامي شهادة الربط بالما والضو.

دابا كيفاش واحد بحال الحمامي للي كيستغل قبة البرلمان باش يبان أنه كيدافع على الدراوش، وأنه مع تطبيق القانون، وانه ضد التهرب الضريبي، وانه ضد الفساد، وانه هو الي كيشرع القوانين، وكيطرح الاسئلة الشفوية والكتابية على الوزراء، هو نفسو البرلماني ممثل الأمة، ياحسرة، للي ما كيديكلاري لصندوق الضمان الاجتماعي ما كيصرح لادارة الضرائب، و كيوقع وكيرخص لراسو المشاريع ديالو بلا احترام المساطر والقوانين الجاري بها العمل، والحمامي هو نفسر للي غرق بني مكادة بالرخص الحمامية، وللي فالفترة ديالو أباطرة العشوائي اكتسحوا أراضي الجموع، وهذا ملف غادي يجي وقتو.

هادي سميتها السيبة، وبحال هاد الناس هوما للي كيشوهو صورة مؤسسة دستورية بحال البرلمان عند المواطنين، وهنا الناس من حقهوم يفقدو الثقة..

دابا قدام هاد الفضائح الخطيرة للي كتحاصر الحمامي من كل جهة، من حق المواطن البسيط يطرح السؤال التالي: 

* واش وزارة الداخلية ما فراسهاش هاد الفضايح، واش معندهاش المفتشية العامة ديالها نجي لمقاطعة بني مكادة؟!

* واش وزارة المالية مافرسهاش هاد المصايب، واش ما قاداش تصرد المفتشية العامة ديالها تشوف الفضايح للي كاين فمقاطعة بني مكادة، وتفتح تحقيق فعدم تصريح بمداخيل وارباح مدرسة كيقرا فيها مئات التلاميذ؟!

* واش صندوق الضمان الاجتماعي ما عندوش اجهزة الرقابة وتحقق فعدم تصريح الحمامي لصندوق الضمان الاجتماعي منذ سنوات.

 الخلاصة:

باش تدير هاد الفضايح كلها وتعطي السنطيحة فالبرلمان وفدورات مجلس المدينة و فمجلس المقاطعة، وتبان انك اكبر محارب ديال الفساد خص يكون سميتك الحمامي.