محمد العمراني

واش هداك المسؤول على وكالة بريد بنك فأصيلة عندو شي حس د المسؤولية او معندوش؟..

حيث من غير المعقول و المقبول ان الشباك الأوتوماتيكي الوحيد ديال بريد بنك فأصيلة كلها ديما خاسر، راه حيبقى مبلوكي بالأيام، ويقدر يخدم ساعة ويتبلوكا نهار..

المشكل هو ان هاد الشباك كيستعملوه معظم المتقاعدين والناس للي كيستفدو من الدعم الاجتماعي، وبالتالي هاد الناس مساكن، للي كبار فالسن وللي مراض، صبح نهاية كل شهر موعد دائم ديال العذاب والتكرفيس، حيث كيبقاو واقفين بالساعات يتسناو لعل وعسى هاد العجب للي مسمي شباك إلكتروني يخدم.

هاد الشوهة كلها وسعادة المدير جالس فالمكتب المكيف ديالو كيتفرج، وكأنه يستمتع كل يوم بمشاهدة طوابير المتقاعدين والمستفيدين من الدعم الاجتماعي مجوقين على هاد الشباك كيتسناو مساكن لعل وعسى يجود عليهوم بجوج فرنك للي كيتسناوها على احر من الجمر.

الافظع من هاد شي هو ان الادارة الجهوية وحتى المركزية ماسوقهومش، ماشي فهاد العالم، ولا يهمهم اطلاقًا هاد المعاناة ديال مرتفقي هاد الوكالة، لأنه من الناحية التقنية راه كيبان هاد الشباك ديما مبلوكي، والمسؤولية ديالهم كتفرض انهم يتدخلو ويشوفو الحل، واش الامر يتعلق بالريزو او ان الشباك من الجيل القديم وخصو يتبدل.

الخلاصة، هو انه بحال هاد المسؤول هوما للي كيساهموا فالتشويش على المجهود الكبير للي كتبدلو الدولة على مستوى العديد من المبادرات والقرارات ذات الصبغة الاجتماعية، حيث باين ان الإحساس بالمسؤولية مفقود عندهوم.

ولاحول ولاقوة إلا بالله العلي العظيم.