محمد العمراني

 واش مقاطعة السواني ماخاضعاش لقوانين البلاد؟!

الناس كتسول واش هاد المقاطعة هي فعلا تحت حكم إمبراطور سميتو سعيد أهروش، عندو الحدود الجغرافية ديالو، كيقرر فيها للي بغى ودير للي بغى، و كيزطم على القانون فوقاش بغى!!.

باش ما تقولوش ان هاد الكلام فيه مبالغة واستهداف، وباش ما تقولوش حنا مجرد مشوشين، نهدرو على واحد القطاع مهم بزاف وعندو تأثير كبير على جميع مناحي الحياة فتراب هاد المقاطعة، الأمر كيتعلق بقطاع السير والجولان من "البلايك " حتى ن "لي دودان"، وطبعا هاد القطاع عندو ضوابط وشروط كتحكمو وكتحدد الإدارات والمصالح المتدخلة فيه.

و حيث ان سلطات الولاية، باعتبارها الجهة المسؤولة فعليا على فرض احترام القانون، وهي للي مفروض تتدخل بصرامة لوضع حد لاي خرق او اختلال، ما كرهناش تدير واحد البحث على قطاع التشوير الطرقي فتراب هاد المقاطعة، وتشوف واش خاضع للقانون او لقرارات الإمبراطور أهروش؟!.

‎سيرو تاكدو من البلايك ديال انتيردي 

‎او ديال ممنوع الوقوف والتوقف للي تركبوا بطريقة قانونية فعدة شوارع، وجا الإمبراطور اهروش قلعهوم 

بدون ما يحاشيه لحد، ومين كنقول تركبوا بطريقة قانونية فمعناه ان لجنة تقنية فيها ممثل الولاية وفيها البوليس وفيها القسم التقني ديال الجماعة وفيها رئيس جماعة طنجة او من يمثله، وكيتم التوقيع على محضر لوضع شي بلاكة او إحداث شي دودان. 

وشحال من بلايك ديال ممنوع الوقوف والتوقف وديال ممنوع المرور وشحال من دودان تركبوا بقرار فردي من الإمبراطور اهروش بدون لجنة بدون قانون، بدون اعتبار لشي ادارة او موسسة او سلطة فهاد المدينة.. 

وللي بغى يتأكد يمشي يشوف محيط سوق كاسبراطا، وشارع ابن عرضون، وشارع مولاي عبد العزيز، وشارع مولاي سليمان وزيد وزيد.. 

وهنا غادي نطرحو السؤال، علاش السلطة المحلية من رئيس الدائرة والقياد وصولا للمسؤولين ديال الولاية كولهوم ساكتين على السيبة للي كتعرفها مقاطعة السواني؟!.

الناس دابا من حقها تيق باللي اهروش عندو الحماية والحصانة حيث معاه الليموري، للي كيقول ان عندو مفاتيح القرار داخل الولاية. وإلا علاش القايد ديال 15 ومعاه رئيسة الدائرة ناضو كيدعموه ضدا على القانون، وضدا على محاضر اللجنة التقنية المختصة.

واش الولاية عارفة أن قربالة للي دارها أهروش على بلادكة د انتيردي كانت بسبب تضرر مصالح عشيرو للي عندو محل مهم ديال التجارة، وهاد البلاكة غادي تأثر على الرواج التجاري ديالو ؟!

واش الولاية عارفة أن واحد الشارع فيه أكبر عدد ديال محلات بيع الزليج جا إمبراطور السواني دار بلاكة ديال ممنوع الوقوف والتوقف باش يضيق عليهوم فالتجارة ديالهوم خدمة لواحد عشيرو وعزيز عليه حيث هاد التجار كينافسوه؟!.

واش الولاية فراسها البلايك ديال ممنوع الوقوف والتوقف للي حذفها حاكم السواني قدام باركينج د صوماجيك باش يحافظ على اصواتو الانتخابية بسوق كاسباراطا، للي غارق فضائح وخروقات جاي الوقت باش نكشفوها للرأي العام، والمصيبة السلطة المحلية ضاربة الطم كتتفرج؟!.

 واش الولاية عارفة ان إمبراطور السواني كيفرض البلايك او كيحذفهوم بناء على واش نتا من الخصوم او من الاتباع، إما كينتقم منك أو كيتهلى فيه و فالتجارة ديالك إذا كنتي من الاتباع؟!

دابا كيفاش القايد ديال الملحقة 15 عرف يدير انقلاب على قرار لجنة تقنية فيها الولاية والبوليس والقسم التقني ديال الجماعة، وما قدرش يمنع أهروش من السيبة للي داير فزرع البلايك، والكارثة ان رئيسة الدائرة حتى هي مشات فنفس الصف ديال إمبراطور السواني!.

بزاف على هاد الجبروت، والمصيبة ان هاد السيبة والولاية بمسؤوليها الكبار كيتفرجو؟!!

إذا كان إمبراطور السواني عندو هاد النفوذ وهاد الحصانة غير خبرونا باش نضربو الطم عند تحسبونا مشوشين!!!!.