محمد العمراني

الخميس للي فات عرف مجلس جماعة طنجة نقاش كبير على سوق سيدي حساين، و بان العمدة  الليموري وداعمه القوي فالمنصة محمد غيلان متوترين، خصهوم النقطة تدور بأي طريقة، واستعملو جميع الضغوط، وطبعا تخبعو كعادتهم دائما فالسلطة وقالوا للأعضاء راه الكاتب العام د الولاية عاطي التعليمات باش تدور النقطة، لكن إصرار الأعضاء على معرفة جميع تفاصيل الموضوع، والتشبث ديالهم باحترام المساطر وضرورة عرض النقطة على لجنة المالية فرض على الليموري يأجل النقطة ليوم الجمعة، على أساس ان ينعقد اجتماع مشترك للجنتي المرافق والمالية غدا الأربعاء لمناقشة شنو هاد الموضوع.
طيب شنو القصة؟
الموضوع كيتعلق بإعادة توظيف سوق سيدي احساين الاسبوعي لبيع الماشية وإضافة انشطة اخرى منها بيع اللحوم الحمراء والبيضاء وبيع السمك وخصوصا احداث سوق لبيع السيارات المستعملة، وجات هاد الفكرة بعدما سجلت الجماعة عدم إقبال المواطنين على سوق الماشية.
تفكير مزيان، ولكن سوء النية بدأت فالسنة المنصرمة حين تمكن الثنائي منير وغيلان من تمرير دفتر تحملات للي تصادق عليه فدورة فبراير 2024، بموجب المقرر 24/223، هاد سوء النية كيبان بوضوح فالمادتين الرابعة والخامسة للي نصت صراحة ان شركة Broody Green، للي عندها صفقة الاستغلال هي للي غادي تبقى مشرفة على تدبير السوق في هيكلته الجديدة.
لكن الولاية عاقت بهاد الخرق الخطير للقانون، ورفضت تصادق على ديك الكارثة، لان استغلال الملك العام ضروري يكون موضوع مزايدة.
مزيان، هنا سي غيلان خَدّم مزيان المؤهلات للي عندو، وبدعم مطلق من الليموري وجد مشروع دفتر تحملات جديد، وطلبو انعقاد اللجنة الادارية للخبرة باش يتحدد الثمن الافتتاحي، وهي اللجنة للي ترأسها الكاتب العام للولاية الجديد للي يالله هادي أربع اشهر باش تسلم المهام ديالو، وفعلا تم تحديد الثمن الافتتاحي ديال المزايدة ف 150 مليون سنتيم سنويا.

دابا آجي ندخلو للمعقول وغادي نطرح هاد المعطيات للي خص الثنائي منير وغيلان يعطيو توضيحات بشأنها للمنتخبين وللكاتب العام د الولاية وطبعا للرأي العام للي خصو يعرف ما يجري ويدور.
1- غيلان خصو يجبد المحضر الثلاثي الموقع بين جماعة كزناية وجماعة طنجة وولاية طنجة للي بموجبه تم الاتفاق على إحداث سوق أسبوعي للماشية مؤقت في انتظار جماعة كزناية تبني سوق أسبوعي جديد لان السوق القديم مابقاش.
2- سي غيلان واش خبرتي السادة الأعضاء ان جماعة كزناية انتهت من تجهيز سوق أسبوعي نموذجي بمنطقة بدريون وخصصت ليه ميزانية 3,5 مليار سنتيم، بالمجزرة ديالو بالمحلات ديالو وبجميع المرافق .
علاش طرحت هاد السؤال حيث ببساطة افتتاح سوق بدريون عمليا غادي يكون إعدام لسوق الماشية الأسبوعي د سيدي حساين، وللي هو فالحقيقة سوق عشوائي، وبالتالي آسي غيلان اي اعتمادات سيتم صرفها فسيدي حساين غادي يكون إهدار للمال العام عن سبق اصرار وترصد.
3- فمشروع دفتر التحملات كاين نية مبيتة لإخفاء الحقائق، وغادي نسولك علاش ما كشفتيش طبيعة العقار ديال سوق سيدي حساين، حيث نتا عارف ان العقار موضوع مطلب التحفيظ رقم 06/16970 هو في ملكية الجماعة السلالية لمدشر عين عسل وخندق الزرزور فتراب جماعة كزناية، والمصيبة ان جماعة طنجة ما دارات حتى مسطرة ديال الاقتناء او الكراء طويل الأمد، والخطير انه فدفتر  التحملات فالمادة الرابعة كتقول العقار تابع للملك العام لجماعة طنجة، وهذا تزوير صريح للوقائع يجب محاسبة كل من تورط فيه.

 4- كيفاش حاط فدفتر التحملات ان الفائز بصفقة استغلال السوق مطلوب منو يجهز باحات لبيع: الماشية، الحبوب، الخضر، ويقوم ببناء محلات لبيع اللحوم الحمراء والبيضاء والسمك، وكذلك يقوم بتجهيز فضاء للركن وبيع السيارات المستعملة، زائد مرافق اخرى.
السؤال موجه للفهيم سي غيلان الغزواني : هاد الفائز بصفقة استغلال السوق واش غادي يجهز بالتوفنة أو البيطون أو الزفت؟، واش غادي يبني المحلات بالقصدير أو باللوح أو بالياجور والسيمة؟.
راك مقاول ياحسرة وكتفهم مزيان فالبناء والتجهيز!.
حاجة اخرى كيفاش آسي غيلان خلطتي باركينغ ديال السيارات مع الفضاء ديال بيع السيارات المستعملة. المفروض يكون كل واحد بوحدو، حيث خص فضاء بيع السيارات يكون عندو باب الدخول وباب الخروج ومكتب لتسجيل عمليات الاستخلاص على عمليات الولوج و بيع السيارات. 
المفروض آسي الفهيم إذا كنتي فعلا باغي ترفع المداخيل كان خص كل نشاط  يتعمل فيه دفتر تحملات خاص و مزايدة خاصة به، بحال للي تعمل فسوق الجملة الجديد. حيث للي كيعرف في بيع الماشية مغاديش يعرف في بيع السيارات او بيع اللحوم والأسماك.

5- آسي عيلان نتا زعما مول نظرية تسيير الجماعة بعقلية المقاولة، 
والتسيير المقاولاتي كيشترط التنظيم والتدقيق، وتحديد الالتزامات والواجبات ، ومعرفة حجم الاستثمار. 
وهاد شي ما يمكنش يتعمل بواحد الكروكي عدلو واحد تيكنيسيان فالادارة، معندو حتى صبغة قانونية، فالحقيقة فكرني بديك الكروكيات ديال الناس دالعشوائي، وكيقولو للناس حنا كنبيعو بالبلان، وهو فالحقيقة الصينية د كالينطي مفصلة حسن من ديك الكروكي!!.

السي غيلان اعادة توظيف السوق كيفرض قانونا يتم تكليف مكتب دراسات يوجد التصاميم ويحدد بدقة طبيعة التجهيزات والأشغال المراد إنجازها وكلفتها التقديرية، باش المتنافسين يعرفو علاش داخلين، ماشي تخلي الجن فاللبن.
واش هادي هي الشفافية؟ راك رجعتي بنا لفترة العشوائي ديال أيام 20 فبراير وللي كتعقل عليها مزيان..

هاد شي كولو ساكت عليه الثنائي منير وغيلان،  ومقصود حيث تما غادي يوقع اللعب، و غادي يطير للي باغيين تطيروه وغادي يفوز للي محظوظ، وكولشي بالقانون للي فصلتيه بالمقاس، وعليها سطرتي فالمادة الاولى على إمكانية التعاقد بالتراضي.

المصيبة انه رغم الدعم القوي ديال الليموري، ورغم تعليمات وتوجيهات ونصائح الموظف القوي المتحكم في جميع الخيوط، واخا انه حريص يبقى فالظل، و رغم المجهود الكبير للي درتيه آسي غيلان الفهيم هاد الفيلم فالحقيقة ولى مفضوح، وهاد الملف ريحتو عطات من بعيد، راه خص الكمامة دابا.

هاد خيلوطة المعنى ديالها هو ضميس الكارطة، ونتا عارف آ غيلان الفهيم شكون عندو اللاص وشكون عندو الري!.

سي غيلان الفهيم، زعما مين كان عندك خلاف مع الليموري كانت المداخلات ديالك منظمة، وكانت عندك افكار ديال التسيير العصري والمقاولاتي، ولكن المصيبة هو  مين تصالحتي مع الليموري وعجباتك الجلسات المغلقة في فيلا السوريين ولى عندك تفكير عشوائي 
الرجوع لله آسي الفهيم، والله يجعل آخرنا حسن من أولنا، وارزقنا حسن الخاتمة، ولاحول ولا قوة إلا بالله العظيم.