محمد العمراني

واش محمد الحمامي، البرلماني الاستقلالي، مزال ما اقتنعش أن الاغلبية الساحقة ديال مستشاري مقاطعة بني مكادة سحبت منو الثقة، وانه فعلا ولى مشكل حقيقي فأكبر مقاطعة بالمغرب وعبئ ثقيل على الحزب ديالو و حتى على السلطة.

البارح الجمعة كانت الدورة ديال يناير، ومرة اخرى لم يكتمل النصاب، بعد غياب 26 عضو من أصل 44. لكن الحمامي عوض ما يفهم الميساج ويحط السوارت، بدا كيهدد الأعضاء المقاطعين، وتفكر التحالف الثلاثي و الرباعي، ونسى انه تواطأ اكثر من مرة على هاد التحالف، وخدا قرارات ضد مكونات التحالف، وهاد شي عادي عند الحمامي، حيث هو معروف انه كيشوف فقط المصلحة ديالو.

اكثر من ذلك، الحمامي قال انه ابتداء من الاسبوع المقبل غادي ينوض يشتغل، وهذا اعتراف انه هادي سنتين ماكانش كيشتغل، كان مهتم بأمور اخرى، وطلب من النواب ديال يا الرجوع لبيت الطاعة او يحطوا السوارت، وما يستفادوش من الامتيازات ديال الجماعة، يعني السيارات الموضوعة رهن إشارتهم، ونسى الحمامي انه بوحدو كيتصرف في أربع سيارات ديال الجماعة، وهذا اكبر دليل على الريع واستغلال النفوذ، ونتمنى الحمامي تكون عندو الشجاعة ويقول فين هي هاد السيارات الأربع، فالوقت للي المصالح الادارية والتقنية ديال المقاطعة محرومة من سيارات الخدمة.

لكن المثير فتصريحات الحمامي هو انه قال خص نخدمو فالمقاطعة بناء على التوجيهات ديال سيدنا.

واش من نيتك آسي الحمامي؟!

لو كنتي فعلا ملتزم بتوجيهات سيدنا كون الأمور بخير داخل المقاطعة.

التوجيهات ديال سيدنا ديما كتركز على المعقول، وعلى الجدية، وعلى النزاهة، وعلى نظافة اليد، وعلى الحفاظ على المال العام، وعلى الإنصات للمواطنين وإيجاد الحلول للمشاكل ديالهوم دون ابتزاز، وعلى الابتعاد عن استغلال النفوذ..

هادي هي التوجيهات ديال سيدنا، وللي خص كل مسؤول يتقيد بها.

دابا سي الحمامي نتا رئيس ديال المقاطعة لمدة 14 سنة ( من 2009 إلى 2015 ومن 2021 إلى اليوم) واش كاين التزام واحد بالتوجيهات ديال سيدنا؟

جولة وحدة فتراب المقاطعة كتفضح الإجرام للي ترتكب فحق البلاد والعباد خلال هاد السنين الفايتة، وللي غادي يجي الوقت نفصلو فيه بالتدقيق، الفرقة الوطنية كتحقق فالفضائح للي ارتكبتي، واخا كتعطي الميساجات انك قدرتي طويتي الملف، مع العلم انه مزال ملفات أخرى تنتظر دورها باش يتفتح بشأنها التحقيق..

فوق هاد شي كامل، الناس عارفة المسار ديال أي واحد تحمل مسؤولية تسيير الشأن العام، عارفين كيف كان وكيف ولى، والناس ما كتخفى عليها والو، كتعرف مزيان شكون للي كان عفيف وشكون للي كانت يدو طويلة.

نصيحة أخيرة: عندك تيق راسك آسي الحمامي، وتبقى فكل اجتماع تفتخر انك جيبتي الأصوات بزاف وعملتي اكتساح، وعندك الشعبية، و عندك دور فالاستقرار الاجتماعي فبني مكادة، وآخر مرة جيدتي هاد الفيلم كان نهار الخميس فالاجتماع مع الوالي التازي.

علاش كنعطيك هاد النصيحة، حيث الرؤساء للي تعزلوا وللي مشاو للحبس كاملين كانوا كيقولو نفس الكلام، ولكن تبين انهم دايرين الفضايح فالتسيير، وتحاكموا بجرائم نهب وتبديد المال العام.

وعيق آسي الحمامي قبل فوات الآوان.