محمد العمراني

واحد الظاهرة خطيرة بانت فطنجة من نهار تم تنصيب المسمى منير الليموري عمدة للمدينة، وهي انه فين ما تجرأ شي صحافي وكتب عليه كتنوض صفحات مجهولة الهوية والنسب لمهاجمته ونهش الأعراض ديالو.

من بين هات الصفحات للي مامعروفش شكون كيسيرها، كاين: “خبايا طنجة"، "طنجة السوداء"، و طنجة تايمز".هادو صبحو متخصصين في استهداف ومهاجمة اي واحد انتقد أسلوب تدبير العمدة الليموري، وللي معروف انه من كبار مصنعي الصباط فطنجة.

يا ويلو هذا للي تجرأ على فخامة الرئيس، يكون متأكد انه غادي يدخول للمشرحة، وكاتب هاد السطور خدا حيز كبير من هاد الهجومات، وصلت حد الاتهام بالمثلية، والارتزاق والابتزاز والفقر والسعاية، إلى غير ذلك من قاموس الواد الحار الذي يعبر عن النفسية المريضة للمحرضين وللي مخبعين وراء شاشات الهاتف.

هاد شي كيوقع و الليموري، للي صبح معروف بعمدة الفضايح، كيفرنس وكيكركر، ولسان حاله يقول: "تفرجو شنو كيوقع ليماهوم"، وشوفو "العلاوة ديالهوم كتطيح فالأرض"، بحال للي قال احد المنبطحين الجدد الطامعين في الفتات للي كيشيط على مول معمل الصباط.

واحد السؤال: دابا داك القسم للي فالولاية د طنجة وللي من بين المهام ديالو تتبع الشؤون الخارجية والداخلية ديال المنتخبين زعما ماعارف والو، او غير معني بهاد الممارسات المشينة المحسوبة على منتخب من حجم عمدة طنجة، و المغاربة كاملين عارفين شكون هي طنجة؟!. 

المثير للاشمئزاز هو ان حفلات السليخ والشوا ديال الأعراض د عباد الله تتم تحت أنظار مسؤولي البام وعلى رأسهم الامين الجهوي عبد اللطيف الغلبزوري، دون ان يحرك ساكنا، وهو بصمته يكون قد تخندق في جبهة المتواطئين مع هذا الإجرام الذي ترتكبه المليشيات المناصرة لليموري.

غادي يجي شي واحد يقولك والمسؤول الجهوي آش دخلو؟، لا آسيدي راه مسؤول، لان الليموري هو واجهة الحزب فطنجة، وجميع التصرفات ديالو المرتبطة بمهامه كعمدة تخضع للمتابعة والمساءلة الحزبية، وحين تتخصص صفحات مجهولة في مهاجمة ونهش أعراض منتقدي فخامة الرئيس دون ان يتحرك مسؤولو الحزب، هنا كنطيحو في شبهة التواطؤ، وكيولي الغلبزوري وآخرون حتى هوما مسؤولين بحال الليموري وربما أكثر بحكم سلطة القرار للي عندهوم داخل التراكتور، وبناء على مدونة السلوك والأخلاقيات للي صادق عليها الحزب ديالكوم.

والآن وصلنا لمرحلة الفرز وتحديد المسؤوليات، حيث خصنا نعرفو هذا للي كيعطي الأوامر لهاد الصفحات واش عندو علاقة بحزب التراكتور، حيث العديد من المؤشرات تؤكد ان محرك هاد المليشيات منتم للبام ، واذا كانت هاد الكتائب هم فقط متطوعين، وقرروا يوهبو راسهوم في سبيل نصرة الاخ القائد الهمام مول معمل الصباط نعرفوهوم. وعلى داك الشي خص نعرفو رسميا موقف البام اقليميا وجهويا من هاد الميليشيات، وأي صمت سنعتبره دعما ونصرة لهاد الشبيحة.

ثانيا آسي الغلبزوري إذا شاف الرئيس الليموري انه تعرض للتشهير والسب والقذف راه كاين القضاء، وحنا دولة المؤسسات، أما باش تتكلف صفحات مجهولة بمهام سلخ منتقدي صاحب السعادة مول مصنع الصباط، على طريقة ميليشيات "فاغنر"، ف هنا كنطرحو سؤال: واش هاذا هو التراكتور للي باغا بنت الباشا تربح بيه انتخابات 2026؟!.

ملحوظة على سبيل الختم: 

راك واهم وكتحلم آ العمدة الليموري إذا اعتقدتي ان صفحات مجهولة او حتى معروفة غادي ترهب هاد العبد الضعيف، ونصحك ترجع للضغوط والسب والقذف للي تعرضت لو ف 2016/2017/2018، وشوف واش قدرو يهيطوني.

آشنو هاد البلادة وهاد الكلاخ ؟.

الحاصول: راك مفخرة التراكتور وخلاص، ومين ترجع من الزيارة للي عندك غدا لمحكمة جرائم الأموال بالرباط، نواصلو معاك حلقات كشف المستور.