محمد العمراني

بنادم باش تعرف المعدن الحقيقي ديالو عطيه المسؤولية و السلطة، حيث كاين واحد النوعية غير يشد الكرسي كيتْسيّفْ الله يحفظ، كيولي واحد آخور، حتى كتبقى تسول واش هاذا هو هداك للي كان كيبيع صورة الإنسان الغيور على المصلحة العامة، الملتزم بالقانون، إنسان تقيل، رزين؟!!..
المصيبة انه غير كيشد المسؤولية ويجلس على الكرسي كيكشف على الوجه الحقيقي ديالو.

مناسبة هاد القول هو الضجة الكبيرة للي واقعة فطنجة بسبب ما بات يعرف بقضية محمد بولعزايب المسؤول عن خلية الإعلام والتواصل بنادي اتحاد طنجة لكرة القدم.

بولعزايب مند 11 سنة وهو كيشتغل فنادي اتحاد طنجة، يعني دوز ثلاثة ديال الرؤساء (ابرشان، احكان والشرقاوي)، وطيلة فترة الاشتغال ديالو كان ديما محط تقدير الجميع، لا من طرف مكونات النادي ولا من طرف الجسم الصحفي بالمدينة باعتباره رئيس خلية الإعلام بالنادي، حتى جا كرطيط، للي قدم راسو الرجل المنقذ للفريق، الله يسهل لو، اول قرار خداه هو توقيف الراتب على بولعزايب، دابا هادي 6 أشهر ما تخلص، ورغم ذلك سي محمد بقى ملتزم بالعمل ديالو، وبقى ديما داك الشخص الغيور فعلا على فريق د المدينة.
أنا بغيت غير نعرف آسي كرطيط شنو عندك فديك المخ؟ 
كيفاش سمح لك الضمير ديالك( وكيبان موحال واش عندك) انك تحرم شخص من الصالير ديالو ظلما وعدوانا، ونتا عارف انه كيقوم بالعمل ديالو على أكمل وجه، وقبل من داك شي مرضي يماه وهو للي خدام عليها؟!.

المصيبة هو انه بعد الحملة الكبيرة ديال التضامن مع بولعزايب تم تسريب واحد التوضيح بليد منسوب ليك، ويدا كان صحيح انه ديالك فراه مصيبة.

قالك سي كرطيط ما طرد حتى واحد، ولكن هناك موظفين اشباح كيتخلصو فاتحاد طنجة وما كيخدموش، وان سي كرطيط خلص فقط الناس للي عندهوم كونطرا مع الشركة، وهنا غادي نقولولك قول الحقيقة وكون سبع، الشركة عندها الكونطرات مع اللاعبين والطاقم التقني فقط، اما الإداريين فراهوم محسوبين على الجمعية، وهادو فيهوم البعض موظفين في ادارات اخرى ولايحق لهم انهم يكون عندهوم الصالير، كياخدو تعويضات عن المهام ديالهوم، أما بولعزايب راه مستخدم وكيتخلص بالتحويل البنكي من الحساب د الجمعية للحساب ديالو، والسيد خدام ما شبح ما ستة حمص، وكرطيط عارف ان العلاقة ديال المستخدم مع رب العمل ماشي ضروري تكون الكونطرة، المهم هو العمل المؤدى عنه، ويدا كانت عندك الجرأة كشف على لائحة المستخدمين الأشباح.

هو فالحقيقة قصة الصعود ديالك آسي كرطيط نحو القمة بين كبار المستثمرين في قطاع العقار بطنجة تستحق يعرفوها الشباب بكل تفاصيلها، حيث يمكن النجاح ديالك  يكون نموذج خصو يتقلد، وخلال المسار ديال الحياة ديالك بالتأكيد عرفتي شنو هو الفقر شنو هي الحگرة شنو هو الظلم، وبالتالي خصك تكون اول واحد للي ما يظلم ما يحگر ما يتعدى.
آجي  آسي كرطيط
علاش ما تكونش عندك الجرأة وتقول أنا باغي نجري على بولعزايب ونقطع الرزق ديالو حيث هو من المناصرين د حميد ابرشان؟!.

وراه كولشي فطنجة عارف شنو كاين فقاع الخابية.
سي كرطيط بولعزايب من حقو يتعاطف معامن بغى، راه خص تتحاسب معاه على خدمتو، راك ما كتخلصوش من جيبك، راه فلوس اتحاد طنجة هادو. 

وعندك تقول أنا كنصرف من جيبي، نتا آسي كرطيط معروف عليك حساسبي كبير، والله لا طلقتي ريال إذا ما كونتيش ضامن انه غادي يرجع عليك بالربح والربح الكبير، الديكلاري والنوار.

كولشي عارف ان اتحاد طنجة هي القنطرة نحو موقع القرار داخل الجامعة الملكية لكرة القدم، وكواشي كيعرف العائد الاستثماري ديال التواجد فالقيادة ديال جهاز الكرة فالمغرب، وبالتالي ديك القضية ديال راه كيصرف من جيبو على الفرقة فيمكن تغمقو بيها على البعض، اما الجماهير الحقيقية والغيورة على الفريق والمتابعين ديال الشأن الرياضي فطنجة وفالمغرب كيعرفو مزيان الحقيقة.
سي كرطيط واحد الملاحظة على سبيل الختم في انتظار مقالات قادمة:
آجي: مزيان تكون عندك غيرة على فريق اتحاد طنجة، وتحافظ على فلوس الفريق وتدقق الحسابات،  وهذا كيبين حس المواطنة العالي للي عندك.
إيوا هاد الغيرة عندك حتى فالتعامل ديالك مع إدارة الضرائب فيما يخص المشاريع العقارية ديالك، الله يزيدك من نعيمو، زعما كتعطي للدولة حقها بالسنتيم والفاصلة ؟!.

سي كرطيط خليك كبير باش ما تفقدش الاحترام ديال الناس للي تاقو فيك.