محمد العمراني

شوفو التبرهيش ديال منير الليموري، عمدة طنجة ياحسرة فين وصل..

فالوقت للي ساكنة مدينة طنجة كيتسناو الليموري يخصص الوقت ديالو لإيجاد الحلول للمشاكل الكبيرة للي كتعرفها طنجة على كل المستويات: بنيات تحتية، نظافة، إنارة عمومية، نقل حضري، سي العمدة صبح شوغلو الشاغل هو يحذف عمر مورو رئيس جهة طنجة تطوان الحسيمة، من صور الأنشطة الرسمية المنشورة على الصفحة الرسمية ديال جماعة طنجة،  حتى تحول الأمر إلى فضيحة مدوية.

فامس الاثنين ترأست وزيرة السياحة برفقة الوالي التازي وبحضور رئيس الجهة ورئيس غرفة التجارة والصناعة ورئيس جماعة طنجة، مراسيم افتتاح فندق تطبيقي تابع للمعهد المتخصص فالتكنولوجية التطبيقية الفندقية والسياحية.

لكن مين كتدخول  للصفحة الرسمية ديال جماعة طنجة كتتفاجأ بصور النشاط محذوف منهوم بطريقة بدائية وبليدة صور رئيس الجهة، في تصرف كيكشف الوضعية النفسية الصعبة للي كيعيشها الليموري، وللي كيبان فيها خايف حتى من صور عمر مورو.

السيد أكد بالدليل ان الغيرة والحقد ديالو على رئيس الجهة بلغت حدا خطيرا، وكتعكس ان الليموري ولى فاقد الثقة فنفسو، وهي حالة مرضية اصبح كيعاني منها هاد بوبريسيتو.

المصيبة انه فالصفحة الرسمية ديال مجلس جهة طنجة جميع الصور المنشورة كيبان فيها العمدة فالنشاط، بحالو بحال جميع الشخصيات الحاضرة.

آ الليموري راك وليتي اضحوكة فطنجة، وبديتي كتلعب صغير، وراك عمدة ديال طنجة آ الشريف، بل راك رئيس رؤساء المغرب، ومع ذلك  كتخاف من مورو يبان معاك فصورة؟!.

آشنو هاد الفضيحة، واشنو هاد اللعب ديال الدراري صغار؟!.

امام هاد الفضيحة، كيبان انه من الأولويات ديال القيادة د التراكتور انهم يديرولك حصص ديال الكوتشين والدعم النفسي باش يزرعو فيك شوية ديال الثقة فالنفس..

وا بزاف آ الشريف..
واش هذا للي داير راسو مع صورة هذا غادي تتسنى تكون منو الكاينة؟!.

عولت عليك بنت الباشا بكري باش تسوگ التراكتور فطنجة فالانتخابات الجاية!..