محمد العمراني
آش هاد السيبة للي واقعة فتراب الدائرة الحضرية طنجة المدينة المسؤول عليها الباشا هشام؟!.
ونهار على نهار كيبان ان هاد السيبة كتزيد تنتشر، شوفو غير المدينة القديمة شنو واقع فيها(هادي خصها مقالات بوحدها)، بلا ما نهدرو على احتلال الملك العمومي، بلا ما نهدرو على السباوات ومقاهي الشيشة، لكن باس توصل السيبة إلى تغيير معالم الساحات العمومية وتحويل لاكاب ديال الدروج إلى محلات تجارية فهادي فاتت السيبة لهيه.
شنو القصة؟
طنجاوا كاملين كيعرفو فضاء الرميلات الترفيهي، للي فيه أماكن للعب الأطفال، وحداه مقهى مندمجة مع المشروع، وفضاء لركن السيارات، وهاد المتنفس هو قبلة لساكنة طنجة باش تفرح مع ولادها.
المقهى تم الكراء ديالها بشكل قانوني، ووفق المساطر المعتمدة، إلى هنا كلشي مزيان.
لكن هاد الايام الاخيرة تخلقت بقدرة قادر واحد المقشدة وحداها واحد المطعم، ومن خلال الاسم ديالهوم يظهر ان المستفيد شخص واحد.
المصيبة هو ان تصميم هاد الساحة ما فيهاش إطلاقا هاد المحلين، للي كاين هو ساحة فيها فضاء للألعاب، مقابلة لمنتزه بيرديكاريس، وفالخلف كاين جوج د الدروج كيهبطوك لموقف السيارات.
الفضيحة الكبرى هو ان شي واحد ناض وحول "لاكابات" ديال الدروج إلى وقشدة ومطعم، وأكثر من ذلك حول ممر الراجلين للي جا بيناتهم إلى امتداد للمحلين وداير فيهوم الطوابل والكراسا، وتحول الأمر إلى مشروع تجاري عشوائي كيدخل الملايين.
بغينا نعرفو كيفاش اولا تم احتلال ملك عام بدون احترام المساطر القانونية المعمول بها، والأخطر من ذلك كيفاش آعباد الله لاكاب يتحول إلى مفسدة او مطعم؟..
فين هي شروط السلامة والصحة؟.
وهنا كتجي المسؤولية ديال الباشا هشام:
كيفاش سمحتي بهاد الفضيحة توقع، واش ما فخباركش ؟ أمبوسيبل.. حيث للي كيوقف على مواطن درويش كيبغب غير يصلح غير شي باب داخل دارو او محلو، ما يمكنش تفوتو هاد المصيبة د الرميلات.
كيفاش آعباد الله المواطن البسيط كيتحرم من حقو فالحصول على الربط بالما والضو لأنه خالف التصميم، او لأنه شرا دار فيها طابق زايد مبني بلا رخصة؟.
كيفاش تاجر بسيط كرا محل تجاري او شراه كيتحرم من رخصة بدعوى انه معندوش شهادة المطابقة، او ما كينش فالتصميم، وفنفس الوقت الناس كتشوف واحد على عينك يابن عدي لاكاب ديال الدروج د ساحة عمومية كيصبح مطعم، ومعرفناش كيفاش استفد من الضو والما وشكون عطاه الرخصة؟.
وهنا خص جماعة طنجة تقول لينا واش هاد السيد كيخلص واجبات احتلال الملك العمومي للي هو فالحقيقة احتلال رصيف مخصص للمارة؟، وعلى اي أساس قانوني تم الموافقة على هاد الاحتلال، ويدا معطاتش هاد الرخصة، علاش ما خداتش الإجراءات القانونية؟..
هاد الفضيحة خصها تحقيق، وللي تورط فيها يتحمل العواقب ديالها.
وقبل ما نختمو، هادي رسالة موجهة للباشا هشام:
زير السمطة الله يخليك، راك مسؤول على منطقة تعتبر واجهة مدينة طنجة، وفيها جميع المواقع والمؤسسات الاستراتجية والحيوية وعلى رأسها القصر الملكي، وفيها المدينة القديمة، وزيد وزيد، يعني القلب النابض ديال المدينة، ومن العار توصل فيها السيبة لهاد الدرجة.
خويا هشام هاد الكومونمون للي عندك كتطلب مجهود كبير وخص تخصص وقتك كامل وعلى الله يكفيك، أما تدوز نص وقتك فلقاءات بديك المقاهي المفضلة عندك، وبالتالي مستحيل يكون عندك الوقت تستقبل المواطنين، وتدير جولات داخل المجال الترابي للي نتا مسؤول عليه.
