محمد العمراني
دقة تابعة دقة، الله يحد الباس، هذا هو حال عمدة طنجة منير الليموري مع الفضايح للي كاتحاصرو فين ما حط رجلو.
من بعد فضيحة سوق الماشية، وللي غادي نرجعو ليها بالتفاصيل، وفضيحة الأزبال للي عرات على فضايح ولد أحيزون مول شركة الزبل، وللي حتى هي غادي نبشو فالخبايا ديالها، تفجرت فضيحة جديدة ديال موظف شبح، من نهار مين تعين فالجماعة ما حط رجلو.
شكون هاد الشبح بالسلامة؟
هذا إسمو بلقايد دوز رئيس لجماعة سيدي اليماني لمدة 14 سنة، وف 2021، طلع رئيس جديد، ومنذ الانتخابات الأخيرة و هو نائب رئيس مجلس عمالة طنجة أصيلة أمحمد الحميدي.
هاد السيد كان فنفس الوقت موظف بجماعة أصيلة، وتحمل مسؤولية مدير مصالح الجماعة، حتى قرر معالي الرئيس و الوزير بنعيسى يقولو حط السوارت، السبب غير معروف، ولكن سي بنعيسى عارف بطبيعة الحال.
هادي شي شهور تم الالحاق ديالو رسميا بجماعة طنجة، والجميع كان كينتظر ان يتم تكليف هاد الموظف بشي مسؤولية مهمة، خاصة وان السيد راه كان مدير مصالح جماعة أصيلة.
لكن الفضيحة، ان هاد الموظف من تاريخ الالتحاق ديالو ما حط رجلو فقصر البلدية أو فشي مقاطعة من المقاطعات، وإذا كنا كنكذبو خاص الليموري يكشف على المذكرة للي كتحدد القسم للي تعين فيه والمسؤولية للي مكلف بها.
الفضيحة الكبرى ان هاد الموظف الشبح، وبحكم انه نائب الحميدي، السيد ساكن فمقر مجلس العمالة، وهو المكلف عمليا بتسيير الشؤون الادارية، ويعطي التعليمات للموظفين رغم ان هاد شي ممنوع عليه قانونا، وفقا لأحكام القانون 112.14، بل أن هاد الموظف وبقوة الضغوط للي كيمارسها على الموظفين قرر مدير مصالح مجلس العمالة يطلب الإعفاء ديالو.
وهنا بيت القصيد، لان الخطة للي داير حزب التراكتور هو تنصيب هاد الموظف مديرا عاما لمصالح مجلس عمالة طنجة أصيلة، طبعا من بعد ما يقدم استقالتو من نيابة الرئيس.
دابا آ العمدة الليموري كيفاش نتا رئيس جمعية رؤساء الجماعات بالمغرب، مفروض تكون قدوة، نتا هو للي كتخرق القوانين وكتشجع الريع وكتغطي على الموظفين الأشباح؟.
أنا كنتساءل كيفاش بنت الباشا كاتقاتل باش تبين حزب البام انه حزب الشفافية والمصداقية والمعقول والنزاهة، ونتا بهاد الفضايح كتضرب المجهود ديالها كامل فالزيرو.
آ ودي راك مفخرة التراكتور والسلام.
