​محمد العمراني

سي الليموري كنعتذرو بزاف منك، وسمح لينا الله يجازيك على إزعاج سيادتكم، خاصة ان اليوم الاحد هو عطلة نهاية الاسبوع، و نتا تبارك الله ما شاء الله كتخدم مزيان وكترهق راسك في خدمة المصلحة د المدينة، ومحتاج للراحة.

غير وكان، بغينا نخبروك ان عدة أحياء فمدينة طنجة، خاصة السانية، الهرارش والشجيرات مقطوع عليهوم الما د الشرب من يوم امس السبت فالخمسة د الصباح إلى حدود كتابة هاد الأسطر، بدون سابق إشعار من شركة امانديس وبدون بلاغ من جماعة طنجة للي نتوما الرئيس ديالها على ما اعتقد.

آ الله يا ودي زعما هاد الناس للي عايشين فهاد الاحياء الشعبية ما كيستحقوش يتخبرو باللي الماء غادي يتقطع باش يديروا الاحتياطات ديالهوم، را كاين ناس كبار فالسن، كاين أطفال، كاين مرضى!!.

حنا عارفين كنتي مشغول فواحد الوساطة فمنطقة الغندوري بين جوج صحابك بورجوازيين، ولكن كوم ميم، كنتي تخرج شوية من الوقت الثمين ديالكوم وتهتم بموضوع قطع الما د الشرب على أحياء بكاملها!.

إذا كنتي آسي الليموري معندكش مشكل فالماء د الشرب، وحتى فالما ديال المسبح الخاص في مقر الإقامة ديالكوم، فالناس مساكن محتاجين فهداك الما د سبيلة وكيتشطرو فالاستهلاك ديالو عندك امانديس تشوط لوم الجيب ديالهوم.

وعليه آسي الليموري إذا جا على خاطرك فتح التلفون وعطي الأوامر 

ديالك لامانديس باش يطلقو الما د الشرب للناس فأسرع وقت.

الخلاصة: الله يصبر الناس د طنجة على هاد المحنة للي كيعيشوها منذ 2021، ويخفف عليهوم ما نزل، هو القادر على كل شيئ.