طنجاوي

هاد الليموري كائن غريب وعجيب وفريد من نوعه، وكل مرة كيكشف على صفات ومواهب جديدة، ولكن كلها تؤكد حقيقة وحدة، وهي أن أي حاجة يمكن توقف في طريق أهدافه كيزطم عليها بلا تردد، ويزيد بلا ما يدور موراه، واخا يكونوا الضحايا هم من أقرب المقربين ليه، وللي كيعرف المسار المهني والسياسي ديال منير كيعرف مزيان انه معندوش شي خطوط حمراء باش يحقق الطموح ديالو، كولشي مباح.

نرجعو للقضية للي شاغلة الرأي العام الوطني والمحلي، وللي تتعلق بتوقيف حسن المزدوجي، المستشار الخاص جدا للعمدة الليموري وإحالته على قاضي التحقيق مع الإيداع في السجن لتعميق البحث معه بخصوص 4 شكايات تتعلق بالسب والقذف وادعاء وقائع كاذبة والتشهير والابتزاز، تقدموا بها صحفيين ومدير مؤسسة فندقيه شهيرة بطنجة والشركة المالكة للفندق.

عشرات المقالات تطرقت لهاد القضية للي صبحت معرفة بفضيحة "العمدة مون بيبي"، وكلها تكلمت على العلاقة للي عند منير مع حسن المزدوجي، باعتباره يقوم مقام مستشارك الخاص، ومع ذلك بقى الليموري بالع لسانو، حتى دار تصريح هاد الصباح للمنبر الإخباري "هسبريس" نفى فيه اي علاقة عندو بقضية حسن المزدوجي، بل نكر تماما ان يكون المزدوجي مستشارا له، وقال باللي هاد الأخير عضو فحزب التراكتور فقط، وزاد نكر ان يكون موضوع شكاية من طرف مدير الفندق.

فالحقيقة هاد التصريح بقدر ما يشكل صدمة للمزدوجي ولعائلته الصغيرة، بقدر ما يؤكد ان هاد شي للي قال الليموري يؤكد الحقيقية ديالو كشخص ما كيعقل حتى على واحد إذا جا فطريقو، والدليل هو انه قرر يقلب الطابلة على المزدوجي، للي كولشي عارف انه مشى ضحية ولائه الأعمى ودفاعه المستميت على الليموري، وانه دخل في حروب لا ناقة ولا جمل له فيها سوى ابتغاء رضى سي منير.

وحيث ان الليموري عندو الوجه قاسح وبلاندي، وحيث انه عندو قدرة عجيبة باش ما يظهر على وجهو ولو نقطة ديال الخجل والحشومة، غادي نطرحو عليه بعض الاسئلة، ونتمناو انه يجاوب عليها، وإلا سنكون مضطرين للإجابة عنها:

١- واش حسن المزدوجي عندو عقد عمل مع الجمعية المغربية لرؤساء الجماعات المحلية للي كتترأسها آسي الليموري؟.

٢- شنو قصة السيارة للي كانت موضوعة رهن إشارة حسن المزدوجي، واش تابعة لجماعة طنجة او مؤسسة البوغاز، للي نتا رئيس ديالهوم بجوج؟.

٣- واش حسن المزدوجي سبق له حضر في مؤتمر يمثل المملكة المغربية بصفته مبعوثا من الجمعية المغربية لرؤساء الجماعات المحلية؟.

٤- واش المنسق الجهوي لحزب البام سبق نبهك آ العمدة الليموري للممارسات المشينة ديال المزدوجي وطلب منك تلجمو؟.

٥- ممكن تكشف للرأي العام مع من كنتي في اتصال دائم خلال التقديم ديال المزدوجي امام النيابة العامة يومي الجمعة والسبت المنصرمين سواء بالتلفون ديالك او بالهاتف ديال مقرب منك وكاتم أسرارك؟.

٦- شكون كلف نائبة ديالك آسي الليموري باعتبارها محامية باش تآزر المزدوجي؟.

٧- واش سبق لك اتصلتي بإدارة الفندق، للي مقدم شكاية بالمزدوجي وحتى بيك، وكنأكد عليها انك مشتكى به أيضا، وطلبتي منو يتكلف بإيواء ضيوف مهرجان ماطا، للي المدير ديالو هو زوج فاطمة الزهراء المنصوري، وأنك نتا للي غادي تخلص المصاريف؟.

٨- واش كتنفي ان مدير الفندق راسلك واتصل بيك اكثر من مرة كيطلب منك تخلص فاتورة إيواء ضيوف مهرجان ماطا؟.

٩- واش كتنفي ان الشيك للي دفع المزدوجي لادارة الفندق كان بطلب منك، و ذلك مقابل اداء فاتورة مهرجان ماطا؟.

١٠- واش كتنفي ان ادارة الفندق راسلاتك ككتخبرك بأن شيك المزدوجي بدون رصيد وأنها غادي تاخود الإجراءات القانونية؟.

١١- واش تنكر انك كنتي آخر واحد شاف المزدوجي قبل مايتم التوقيف ديالو من طرف الشرطة القضائية وكان معاكوم مستشار آخر مكلف بالتواصل والفيزات؟.

١٢- واش تقدر تقول شكون هذا للي قنع المزدوجي باش ينفي اي علاقة بين الشيك ديالو وفاتورة مهرجان ماطا؟.

١٣- واش تقدر تعترف شكون وفر 30 مليون قيمة الشيك د المزدوجي وتحطت فصندوق المحكمة؟.

باركا عليك آ المجتهد، ننتظر الجواب، وحنا عارفين ان البوصلة مشاتلك حيث كبير الدساسين خوا المدينة، ومابقاش عندك الموجه.

نتمنى ان تفك العقدة من لسانك وتخرج توضح للرأي العام تفاصيل هاد القضية، اولا كعمدة لان المزدوجي مربوط بيك، وثانيا بصفتك الامين الاقليمي ديال التراكتور ونتا اعترفتي ان حسن عضو فالمكتب الاقليمي د الحزب.

ملاحظة أخيرة: من الأفضل انك تعلن من تلقاء نفسك على تجميد العضوية ديالك فالبام إلى حين الحسم قضائيا فهاد الملف، وتجيب البراءة ديالك، وذلك حفاظا على صورة الحزب، لأنه كون متأكد بأن بنت الباشا غادي تتوصل بالملف معزز بالوثائق والأدلة مباشرة بعض رفع السرية عليه، حيث دابا لازال قيد التحقيق القضائي، وآنذاك والله فاطمة الزهراء المنصوري لا تعاتقت معاك لأنك أسأت للحزب، وأقحمت زوجها في قضية هو في غنى عنها، حيث مادام ما قادش تدعم مهرجان ماطا من مالك الخاص، علاش دخلتي زوج بنت الباشا فهاد الدين الضيق؟!.