محمد العمراني

قبل لحظات، وخلال اشغال دورة اكتوبر لمجلس مدينة طنجة، تناول الكلمة سي غيلان الغزواني النائب الاول للعمدة الليموري، تطرق فيها ن المقال للي نشرناه امس فمنبر “طنجاوي" تحت عنوان: "قضية "العمدة مون بيبي".. غيلان الغزواني هو الدليل للي كيورط الليموري فهاد القضية الخانزة"، وفهاد المقال وضحنا كيف كان غيلان عرضة لابشع أنواع السب والقذف والنهش فالعرض ديالو عندما كان يعلن معارضته للعمدة، ومباشرة بعد التحالف ديالو مع الليموري اصبح غيلان رمزا للنزاهة والحنكة والغيرة على مصالح المدينة والساكنة.

سي غيلان عوض ما يعلن التضامن ديالو مع ضحايا المستشار الخاص ديال عمدة طنجة الموجود رهن الاعتقال بسبب شكايات بالسب والقذف والتهديد تقدمت ضدو ، وللي حتى هو - غيلان - كان من الضحايا قبل ما يدخل لبيت الليموري ويصبح آمنا، ناض كيتقمص دور المفتي والرجل الناصح، وتذكر فجأة ان عندو ولادو كيشوفو ما ينشر، ونعت المقال ديال "طنجاوي" بالوقاحة.

الله اكبر،

دابا استنكار حملات السب والقذف ونهش الأعراض للي مورط فيها مقرب من الحليف ديالك الليموري اصبحت وقاحة؟!.

الوقاحة الحقيقية آسي غيلان هي انك تقبل على راسك تتحالف مع العمدة الليموري وأنت متأكد من انه حملات السب والقذف للي تعرضتي ليها كانت بعلمه ومستشاره المقرب هو المتورط الرئيسي!.

الوقاحة الحقيقية آسي غيلان هي تنقلب على المواقف ديالك تجاه الليموري 180 درجة، والله يجعل البركة ف سي "يوتوب" راه مزال محتفظ بالفيديوهات ديالك كاملين، وللي غادي نرجعو ليهوم بالتفصيل، وعندك آسي غيلان تيق راسك وتقول باللي التحالف ديالك مع الليموري كان من اجل مصلحة المدينة، نتا عارف وانا عارف السبب الحقيقي، وغادي يجي الوقت باش نكشفوه للرأي العام، للي مفروض يعرف الحقيقة ولاشيئ غير الحقيقة، وبلا ما تتقمص دور المناضل للي اكتشف فجأة المصلحة العامة ديال المدينة.

الوقاحة آسي غيلان هي تكون شاهد عيان على الجرائم للي ارتكبها مستشار الحليف ديالك الليموري في حق زملاء ديالك فالحزب وأصدقاء ديالك، وقبلتي على راسك تبلع لسانك، وما تقدرش تقول اللهم هذا منكر، وراك عارف علاش قبلتي تكون في منزلة الساكت عن قول الحق، حيث رهنتي نفسك لليموري للي واعدك باش يحل لك المشكلة. 

الوقاحة آسي غيلان هي تمشي تحذر الزملاء ديالك فالحزب وتقول لهم وقفو الانتقادات ديالكوم للعمدة راه غادي يجبدو لكوم العلاوة ديالكوم، يعني قبلتي على نفسك توصل رسالة التهديد صادرة عن الحليف ديالك.

الخلاصة آسي غيلان هو أننا غادي نكشفو بالادلة وبلسانك وشحمك ودمك فين هي الوقاحة د بصح.