محمد العمراني
طيلة الأسابيع الأخيرة راج كلام كبير وتنشرت مقالات "مخدومة" تدعي وجود عصابة منظمة فيها منتخبين وموظفين وعدول متخصصة فالتزوير والسطو على الأراضي، وهناك شكاية رسمية يحقق فيها القضاء حول شبهة تزوير شهادة ادارية قصد التحفيظ.
نخليو القضاء يدير خدمتو، وللي مؤكد ان القانون غادي يطبق فحق أي متورط كيف ما كان الوضع ديالو .
الجميل فهاد القضية، هو ان رئيس قسم الشؤون القروية بولاية طنجة للي جا من ميدلت ب" حصيلة ثقيلة"، غادي نرجعو ليها فالوقت المناسب، ومع الطريق بعيدة بين ميدلت وطنجة، لابد ما نديرو استراجة فواحد الإقامة فاخرة فزومي، قبل ما نوصلو للمحطة الاخيرة فطنجة ب "KLK”.
ما علينا هاد المسؤول لاعب دور مهم بزاف فقضية الشكاية للي كيبحث فيها القضاء، وكيبين الحرص ديالو على حماية أراضي الجموع من النهب، والتشدد مع رجال السلطة باش ما يتساهلوش فمنح الشواهد الادارية قصد التحفيظ.
هاد شي جميل، وهكذا خص يكون المسؤول الغيور على المصلحة العامة، وهنا غادي نطرحو عليه بعض الاسئلة:
1- آجي آسي احمد، فراسك واحد ثلاثة ديال الشواهد الإدارية توقعو فواحد الملحقة الإدارية بالدائرة الحضرية مغوغة فنفس التاريخ (فشهر دجنبر 2023) ومسجلة تحت ارقام ترتيبية متتابعة (5/4/3)، والخطير انها مسلمة لنفس الشخص؟
طبعا فراسك آسي أحمد، وإلا غادي نشكو فالقدرات ديالك!!
2- هادوك الشواهد وبديك الطريقة واش اعتبرتيهوم قانونيين، زعما كاين الإفادة ديال جميع المصالح وأولهم نائب الجماعة السلالية؟!.
3- كيفاش هاد الأراضي موضوع هاد الشواهد الإدارية تقع في نفوذ ملحقة إدارية بينما ملحقة إدارية أخرى هي من وقعت عليها وسلمتها؟!.
4- واش جاتك عادية آ السيد رئيس قسم أن نفس الشخص يتسلم ثلاث شواهد ادارية فنفس التوقيت وبترتيب متسلسل، زعما بحال إلى هاد الملحقة خدامة مع هاد المحظوظ فقط؟!
5- بالتأكيد فخبارك آسي احمد ان الشهود للي اعتمد عليهوم صاحب الشواهد الادارية باش يعدل الملكيات تراجعوا على الشهادة ديالهوم، وقدموا شكاية ضد العدل للي حرر عقود الملكية، والملف الان بين يدي النيابة العامة المختصة، كما ان المحافظ أوقف مسطرة التحفيظ وأحال الملفات على القضاء؟.
6- واش خبرتي السيد الوالي التازي بهاد المعطيات المثيرة، حيث كولشي عارف الصرامة ديالو وما كيتعاتقش مع السيبة ومع الخروقات؟!.
حاجة أخرى آ السيد رئيس القسم،
هاد الشواهد بثلاثة تعطاو فالفترة للي كان فيها المسؤول القوي آنذاك فطنجة، قبل النقل ديالو إلى منطقة سوس، وهاد المسؤول كان معروف عليه انه كيحضي الشاذة والفاذة، كيفاش دازت عليكوم هاد الفضيحة بلا ما تنتبهو ليها؟!
سي احمد، راه كولشي كيعرفك مرضي الوالدين، وعاد ديتيهوم معاك للحج، ودرتي ليهوم حجة "VIP" الله يخليهوم ليك، إيوا دير خدمتك بإخلاص، ورفع تقرير مفصل بهاد الشواهد الادارية.
حنا عارفين كنتي مشغول بإكمال السيناريو للي كتبو كبير الدساسين، وللي كيدور حول "كيفية اختلاق عصابة للتزوير بدون ادلة او حجج فقط لتصفية الحساب والانتقام"، ولكن دابا مع جبتي الذراع الأيمن ديالك من ميدلت، خص تتفرغ لكتابة التقارير حول ملفات واقعية ماشي مختلقة.
غير هو دير فبالك أن ميدلت ماشي هي طنجة، و"الحصيلة الثقيلة" للي جبتيها معاك تقدر تمشي فرمشة عين فطنجة.
