محمد العمراني
قبل أسابيع قليلة القايد ديال دار الشاوي دار فيها بطل كيحارب البناء الغير منظم، ومشى نفذ الهدم فواحد المصنع بدعوى عندو رخصة أحادية.
مزيان آسيدي، قلنا هاد القايد صارم وكيفوت الصرامة لهيه، ومعندوش مع الخواض، لكن المعطيات الموثقة بالأدلة تؤكد ان جماعة دار الشاوي للي تابعة للنفوذ الترابي ديال هاد القايد عرفت فالعهد ديالو استفحال كبير ديال البناء العشوائي من الصنف الفاخر، وأصبح كل واحد فطنجة عندو الفلوس المجهولة المصدر، او عندو النفوذ يجي لدار الشاوي، يفصَّلْ ويقطَّعْ مع راسو كيف بغى، ويبني الفيلا او شي إقامة فاخرة، ويستولي على الملك الغابوي، او أراضي الجموع، والكلمة السحرية او الكود السري هي فانوس "الدحروش"، شايلاه آ سيدي "الدحروش"، الله ينفعنا بكراماته، غير جيب من عندو الكود، وها نتا جميع الأبواب ديال دار الشاوي مفتوحة على مصراعيها.
بالمناسبة سولو قايد دار الشاوي على كلمة السر "الدحروش" شنو التأثير والنفوذ للي عندها فتراب الجماعة.
مؤخرا صبحت دار الشاوي كتعرف انتشار واحد الظاهرة د البناء العشوائي الفاخر ديال الناس الأبهة، للي صبحو كيفضلو يبنيو فيلات وإقامات فاخرة، إما للقصاير والفرفشة، او للراحة والاستجمام، او للخلوة من اجل التخطيط لعمليات "التصدير" وتسيير الرحلات المكوكية بين الضفتين.
دابا مصالح عمالة طنجة إذا بغات تتأكد من صحة هاد المعطيات تصرد لجنة للتقصي، تمشي للمداشر والدواوير التالية: (خندق أسنان، تامسيلا، و اشراگة..)، غير هو ما يكونش معاهوم واحد "حسن" المعروف بعلاقته المتينة والقوية جدا مع قائد المنطقة، وهاد حسن مشهور على صعيد تراب عمالة طنجة بتحرير التقارير حسب تقلبات احوال الطقس، إذا كانت الخيرات تصب مدرارا فالتقارير وردية تعكس وفرة المداخيل، واذا كان الجفاف والشرقي لا قدر الله تكون التقارير عاصفة يتلوها زلزال الهدم.
دابا الناس ديال جماعة دار الشاوي كيتساءلو كيفاش كيجيو الناس من طنجة كيجبرو جميع الطرقات مفتوحة، كيبنيو مع راسهوم ويسيطرو على الملك الغابري، وعلى أراضي الجموع، بدون تحرك من طرف القايد، ما كاين توقيف، لا مخالفات، لا هدم، ولكن كولشي عارف ان عندهوم الموافقة والدعم والحماية الدحروشية!!.
جوج أسئلة على سبيل الختم:
الاول: واحد قرار إغلاق مصنع السردين فدار الشاوي فين وصل، وعلاش ما تنفذه؟!.
الثاني: شنو القصة ديال واحد القهوة فالعوامة، كولشي كيقول باللي للي بغا الكود السري ديال البناء فدار الشاوي وللي بغى الحماية الدحروشية يمشي يحجز الرونديفو فهاد القهوة؟!..
